ആലപ്പുഴ: ആലപ്പുഴയില്‍ മുന്‍ വൈരാഗ്യത്തിന്റെ പേരില്‍ യുവാവിനെ സംഘം ചേര്‍ന്ന് അക്രമിച്ച കേസില്‍ നാല് പേരെ നോര്‍ത്ത് പൊലീസ് അറസ്റ്റ് ചെയ്തു. കരളകം വാര്‍ഡില്‍ കണ്ടത്തില്‍ വീട്ടില്‍ ഷാജിയെയാണ് അയല്‍വാസികളായ രണ്ട് യുവാക്കളും, രണ്ട് കൂട്ടുകാരും ചേര്‍ന്ന് പാരയ്ക്ക് തലയ്ക്കടിച്ചും മുഖത്ത് വെട്ടിയും പരിക്കേല്‍പ്പിച്ചത്. ചുങ്കം നടുചിറയില്‍ ശ്രീജിത്ത് (33), കരളകം വാര്‍ഡില്‍ കളരിക്കച്ചിറ വീട്ടില്‍ സുമേഷ് (22), കരളകം വാര്‍ഡില്‍ കളരിക്കച്ചിറ വീട്ടില്‍ വൈശാഖ് (20), കൊറ്റംകുളങ്ങര വാര്‍ഡില്‍ നടുവിലെ മുറിയില്‍ ആദില്‍ (21) എന്നിവരാണ് പിടിയിലായത്.
ഗുരുതരമായി പരിക്കേറ്റ ഷാജി ആലപ്പുഴ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. പിടിയിലായ പ്രതികള്‍ സ്ഥിരം കുറ്റവാളികളും കാപ്പ പ്രതികളുമാണെന്ന് പൊലീസ് പറഞ്ഞു. കോടതിയില്‍ ഹാജരാക്കിയ നാല് പേരെയും റിമാന്‍ഡ് ചെയ്തു. നോര്‍ത്ത് സി. ഐ എം. കെ. രാജേഷിന്റെ നേതൃത്വത്തില്‍ എസ്. ഐമാരായ ജേക്കബ്, ദേവിക, സജീവ്, സീനിയര്‍ സി. പിഒമാരായ ഗിരീഷ്, ഹരീഷ് എന്നിവരാണ് പ്രതികളെ പിടികൂടിയത്.
