മലയാള സിനിമയില് പുതിയ റെക്കോഡിട്ട് പൃഥ്വിരാജ്-മോഹന്ലാല് ചിത്രം എമ്പുരാന്. ചിത്രത്തിന്റെ ആഗോളതലത്തിലുള്ള തീയറ്റര് ഷെയര് 100 കോടി കടന്നു. ഒരു മലയാളചിത്രം ഇതാദ്യമായാണ് ഈ നേട്ടം കൈവരിക്കുന്നത്. ആഗോള ബോക്സ് ഓഫീസില് നിന്നുള്ള കണക്കാണ് ഇത്.
മോഹന്ലാലാണ് ഈ സന്തോഷ വാര്ത്ത അറിയിച്ചത്. മലയാളസിനിമയുടെ ചരിത്രത്തിലെ ആദ്യസംഭവം എന്നാണ് മോഹന്ലാല് ഈ നേട്ടത്തേക്കുറിച്ച് പറഞ്ഞത്. സിനിമയുടെ പുതിയ പോസ്റ്റര് പങ്കുവെച്ചുകൊണ്ടാണ് അദ്ദേഹം ഇക്കാര്യം അറിയിച്ചത്. നേരത്തേ ചിത്രം അഞ്ച് ദിവസംകൊണ്ട് 200 കോടി ആഗോള കളക്ഷന് നേടിയിരുന്നു.
ശ്രീ ഗോകുലം മൂവീസ്, ആശീര്വാദ് സിനിമാസ്, ലൈക്ക പ്രൊഡക്ഷന്സ് എന്നിവയുടെ ബാനറില് ഗോകുലം ഗോപാലന്, ആന്റണി പെരുമ്പാവൂര്, സുഭാസ്കരന് എന്നിവര് ചേര്ന്നാണ് ചിത്രം നിര്മിച്ചിരിക്കുന്നത്. മുരളി ഗോപി രചിച്ച ഈ ചിത്രം മലയാള സിനിമയുടെ ചരിത്രത്തിലെ ആദ്യത്തെ ഐമാക്സ് റിലീസായി എത്തിയ ചിത്രം കൂടിയാണ്.
റോബോ എന്ന 2010 ചിത്രത്തിലൂടെ തമിഴ് സിനിമയാണ് സൗത്ത് ഇന്ത്യയില് ആദ്യമായി ട്രാക്ക് ടോളിവുഡിന്റെ കണക്കനുസരിച്ച് 100 കോടി ഷെയര് നേട്ടം കൈവരിച്ചത്. ബാഹുബലിയിലൂടെ തെലുങ്ക് സിനിമയും കെജിഎഫിലൂടെ കന്നഡ സിനിമയും സമാന നേട്ടം സ്വന്തമാക്കി.
