ബോക്സ് ഓഫീസിൽ ചിരിപ്പൂരം തീർത്ത് ഹാഷിറും കൂട്ടരും തകർത്തോടുകയാണ്. മലയാള സിനിമയിലെ അപ്രതീക്ഷിത വിജയങ്ങളുടെ പട്ടികയിലേക്ക് ‘വാഴ 2’ എന്ന വൻ ഹിറ്റും ഇടംപിടിച്ചിരിക്കുന്നു. ഇപ്പോഴിതാ സിനിമാ പ്രേമികളെ ഒന്നടങ്കം ആവേശത്തിലാഴ്ത്തിക്കൊണ്ട് ചിത്രത്തിന്റെ മൂന്നാം ഭാഗം പ്രഖ്യാപിച്ചിരിക്കുകയാണ് അണിയറപ്രവർത്തകർ.
ബോക്സ് ഓഫീസിൽ ‘വാഴ’പ്പടയോട്ടം
ആദ്യ ഭാഗത്തെയും വെല്ലുന്ന പ്രകടനമാണ് ‘വാഴ 2’ തീയേറ്ററുകളിൽ കാഴ്ചവെക്കുന്നത്. റിലീസ് ചെയ്ത് ചുരുങ്ങിയ ദിവസങ്ങൾക്കുള്ളിൽ തന്നെ ചിത്രം 150 കോടി രൂപ എന്ന വമ്പൻ നാഴികക്കല്ല് പിന്നിട്ടു കഴിഞ്ഞു. ഹാഷിറും സുഹൃത്തുക്കളും തീയേറ്ററുകളിൽ സൃഷ്ടിച്ച ഓളം അടുത്ത കാലത്തൊന്നും ഒരു മലയാള സിനിമയ്ക്കും ലഭിക്കാത്ത വിധം വലുതാണ്.
സർപ്രൈസുമായി വിപിൻ ദാസ്
കഴിഞ്ഞ ദിവസം സോഷ്യൽ മീഡിയയിൽ മൂന്ന് വിരലുകൾ ഉയർത്തിപ്പിടിച്ചുള്ള ഒരു ചിത്രം പങ്കുവെച്ചുകൊണ്ട് തിരക്കഥാകൃത്ത് വിപിൻ ദാസ് വരാനിരിക്കുന്ന സർപ്രൈസിനെക്കുറിച്ച് സൂചന നൽകിയിരുന്നു. “വാഴ വളരുന്നു” എന്ന കുറിപ്പോടെയായിരുന്നു ആ ചിത്രം. ഇന്ന് കൂടുതൽ വിവരങ്ങൾ പുറത്തുവിട്ടുകൊണ്ട് അദ്ദേഹം ഫേസ്ബുക്കിൽ എത്തി.
വാഴ ഫ്രാഞ്ചൈസി ഞങ്ങള് സങ്കല്പ്പിച്ചതിലും വലുതായി വളര്ന്നിരിക്കുന്നു. നിങ്ങള് ഞങ്ങള്ക്ക് നല്കിയ എല്ലാ സ്നേഹത്തിനും നന്ദി. സിനിമയിലേക്ക് പുതിയ പ്രതിഭകളെ പരിചയപ്പെടുത്തുക എന്ന ലക്ഷ്യത്തോടെയാണ് ഞങ്ങള് വാഴ ആരംഭിച്ചത്. വാഴയുടെ എല്ലാ അധ്യായത്തിലും അത് അങ്ങനെ തന്നെ ആയിരിക്കും. എഴുതാനോ സംവിധാനം ചെയ്യാനോ അഭിനയിക്കാനോ സംഗീതം നല്കാനോ നിങ്ങള് ആഗ്രഹിക്കുന്നുണ്ടോ എങ്കില് വാതില് എപ്പോഴും തുറന്നിരിക്കുന്ന ഒരേയൊരു ഫ്രാഞ്ചൈസി ഇതാണ്. വാഴ 3 – ഒരു ബില്യണ് പെണ്കുട്ടികളുടെ ബയോപിക്കായിരിക്കും. വിശ്വന് ശ്രീജിത്താണ് ചിത്രത്തിന്റെ സംവിധായകന്. അടുത്ത വര്ഷം സിനിമയുടെ ചിത്രീകരണം ആരംഭിക്കും. അത് ഒരു വലിയ കാത്തിരിപ്പായിരിക്കുമെന്ന് അറിയാം. പക്ഷെ ആ കാത്തിരിപ്പിന് വാല്യു ഉണ്ടാകും. ഇപ്പോള് പോര്ട്ട്ഫോളിയോകളോ വര്ക്ക് സാമ്പിളുകളോ അയയ്ക്കുന്നത് താല്ക്കാലികമായി നിര്ത്തുക. സ്ക്രിപ്റ്റ് ലോക്ക് ചെയ്തുകഴിഞ്ഞാല്, ഞങ്ങള് എല്ലാവര്ക്കും വേണ്ടി തുറന്ന ഓഡിഷനുകള് നടത്തും. ഞങ്ങളെ അഭിമാനഭരിതരാക്കിയതിന് ഒരിക്കല് കൂടി നന്ദി. ഈ ഫ്രാഞ്ചൈസിയുടെ ഹൃദയമിടിപ്പ് നിങ്ങളാണ്. നിങ്ങളോടെല്ലാം സ്നേഹം മാത്രം.
വാഴ 3: പെൺകുട്ടികളുടെ ഊഴം
ഇതുവരെ ആൺകുട്ടികളുടെ സൗഹൃദവും കുസൃതികളും പരാജയങ്ങളും ആഘോഷമാക്കിയ ‘വാഴ’ ഫ്രാഞ്ചൈസി, മൂന്നാം ഭാഗത്തിൽ ഒരു പെൺകൂട്ടായ്മയുടെ കഥയാകും അവതരിപ്പിക്കുക. വിപിൻ ദാസിന്റെ ഈ പ്രഖ്യാപനം സോഷ്യൽ മീഡിയയിൽ വലിയ ചർച്ചകൾക്കാണ് വഴിതെളിച്ചിരിക്കുന്നത്. ഹാഷിറിനും സംഘത്തിനും പകരം വരാനിരിക്കുന്ന ആ പെൺകുട്ടികൾ ആരായിരിക്കും എന്ന ആകാംക്ഷയിലാണ് ഇപ്പോൾ ആരാധകർ.
യുവതലമുറയെയും കുടുംബപ്രേക്ഷകരെയും ഒരേപോലെ കയ്യിലെടുത്ത വാഴയുടെ മൂന്നാം വരവ് മലയാള സിനിമയിൽ മറ്റൊരു ചരിത്രം കുറിക്കുമോ എന്ന് നമുക്ക് കാത്തിരുന്ന് കാണാം.
