തിരുവനന്തപുരം: വൈദ്യുതി ഉപയോഗത്തിന് വ്യത്യസ്തസമയങ്ങളില് വ്യത്യസ്ത നിരക്ക് ഈടാക്കുന്ന രീതി ഗാര്ഹികോപഭോക്താക്കളില് കൂടുതല്പേര്ക്ക് ബാധകമാക്കാന് കെഎസ്ഇബിയില് ആലോചന. നടപ്പായാല് വൈകിട്ട് 6 മുതല് രാത്രി 10 വരെയുള്ള വൈദ്യുതോപയോഗത്തിന് 20 ശതമാനംവരെ കൂടുതല് നിരക്ക് ഈടാക്കും.നിലവില് മാസം 500 യൂണിറ്റില് കൂടുതല് ഉപയോഗിക്കുന്ന വീടുകള്ക്കും വ്യവസായസ്ഥാപനങ്ങള്ക്കും മാത്രമാണ് പ്രസ്തുത രീതി നടപ്പാക്കിയത്. എന്നാല് 500 യൂണിറ്റില്ത്താഴെ ഒരു നിശ്ചിതപരിധിവരെ ഉപയോഗിക്കുന്ന വീടുകള്ക്കും ഇതേരീതി ബാധകമാക്കാനാണ് ആലോചന. അടുത്ത വര്ഷത്തേക്ക് നിരക്ക് പരിഷ്കരണത്തിന് റെഗുലേറ്ററി കമ്മിഷന് അപേക്ഷ നല്കുമ്പോള് ഈ നിര്ദേശം ഉള്പ്പെടുത്താനുള്ള ചര്ച്ചകളാണ് കെഎസ്ഇബിയില് നടക്കുന്നത്. കമ്മിഷന് അംഗീകാരം നല്കിയാല് പുതിയ നിരക്ക് പ്രാബല്യത്തില് കൊണ്ടുവരും