പരപ്പനങ്ങാടി: ഡിഗ്രി ഒന്നാം വര്‍ഷ വിദ്യാര്‍ത്ഥിയെ സീനിയര്‍ വിദ്യാര്‍ത്ഥികള്‍ അതിക്രൂരമായി മര്‍ദിച്ച സംഭവത്തില്‍ കോളജിന്റെ ഇന്റേണല്‍ അന്വേഷണ റിപ്പോര്‍ട്ട് മാനേജ്‌മെന്റിനും പൊലീസിനും കൈമാറും. സംഭവത്തിന് പിന്നാലെ സീനിയര്‍ വിദ്യാര്‍ത്ഥികളെ കോളജ് സസ്‌പെന്‍ഡ് ചെയ്തിരുന്നു.
വിദ്യാര്‍ത്ഥികളെ ക്യാമ്പസില്‍ നിന്ന് പുറത്താക്കുന്നത് അടക്കമുള്ള നടപടികള്‍ ആന്റി റാഗിംഗ് സെല്ലിന്റെ അന്വേഷണ റിപ്പോര്‍ട്ടിനെ അടിസ്ഥാനമാക്കിയായിരിക്കും. മറ്റു പ്രകോപനങ്ങള്‍ ഇല്ലാതെയാണ് ഒന്നാം വര്‍ഷ വിദ്യാര്‍ത്ഥി രാഹുലിനെ സീനിയര്‍ വിദ്യാര്‍ത്ഥികള്‍ മര്‍ദിച്ചതെന്നാണ് പ്രാഥമിക വിവരം.
മറ്റ് ജൂനിയര്‍ വിദ്യാര്‍ത്ഥികളെയും ഇവര്‍ റാഗ് ചെയ്തതായി ആരോപണമുണ്ട്. സീനിയര്‍ വിദ്യാര്‍ത്ഥികളുടെ മര്‍ദനത്തില്‍ കാര്യമായി പരുക്കേറ്റ രാഹുല്‍ കോഴിക്കോട് മെഡിക്കല്‍ കോളജിലെ ചികിത്സയ്ക്കു ശേഷം വീട്ടില്‍ വിശ്രമത്തിലാണ്. ഇതുവരെ ആരോഗ്യനില പൂര്‍വസ്ഥിതിയിലേക്ക് എത്തിയിട്ടില്ല.
