ബസ് ഡ്രൈവറെ ഒരു സംഘം മര്‍ദ്ദിച്ചതില്‍ പ്രതിഷേധിച്ച് കോട്ടക്കലിലെയും സ്വകാര്യ ബസുകള്‍ വ്യാഴാഴ്ച സര്‍വീസ് നടത്തില്ലെന്ന് ജീവനക്കാര്‍ അറിയിച്ചു. കോട്ടക്കലില്‍ നിന്നും സര്‍വീസ് ആരംഭിക്കുന്ന ബസുകള്‍ ഓടില്ലെന്ന് ജീവനക്കാര്‍ പറഞ്ഞു.
ബുധനാഴ്ച്ച വൈകിട്ട് വായ്പാറപ്പടിയില്‍ ഉണ്ടായ സംഘര്‍ഷത്തിലാണ് ഡ്രൈവറടക്കം മൂന്ന് പേര്‍ക്ക് പരിക്കേറ്റത്. ബസ് ഡ്രൈവര്‍ കോട്ടക്കല്‍ സ്വദേശി കാലൊടി അലിറാഫി (34), നാട്ടുകാരനായ വെള്ളാരങ്ങല്‍ സ്വദേശി കണ്ണിയന്‍ ഷാഹില്‍ അഹമ്മദ് (21), ഓട്ടോ യാത്രക്കാരിയായ വേട്ടേക്കോട് സ്വദേശി എന്നിവര്‍ക്കാണ് പരിക്കേറ്റത്.
മഞ്ചേരിയില്‍ നിന്നും തിരൂരിലേക്ക് പോവുകയായിരുന്ന സ്വകാര്യ ബസിനെ ഒരു കാര്‍ ഓവര്‍ടേക്ക് ചെയ്ത് ഗതാഗതം തടസ്സപ്പെടുത്തി. ബസ് ജീവനക്കാരുമായി തര്‍ക്കം നടക്കുന്നതിനിടെ ബസ് അപകടരമാം വിധം മുന്നോട്ടെടുത്തതായി നാട്ടുകാര്‍ പറയുന്നു. മു?ന്നോട്ടെടുത്ത ബസ് ഒരു ഓട്ടോയിലിടിച്ചിരുന്നു. ഇതേതുടര്‍ന്ന് ബസ് ജീവനക്കാരും നാട്ടുകാരും തമ്മില്‍ സംഘര്‍ഷം ഉടലെടുത്തു. തുടര്‍ന്നുണ്ടായ അക്രമത്തിലാണ് ഡ്രൈവര്‍ക്കും നാട്ടുകാരനായ യുവാവിനും പരിക്കേറ്റത്. മൂന്ന് പേരും മഞ്ചേരി മെഡിക്കല്‍ കോളജില്‍ ചികിത്സ തേടി.
