കൊച്ചി: പോത്തുകളെ മോഷ്ടിച്ച കേസിൽ യുവാവ് അറസ്റ്റിൽ. ചാലക്കുടി എലിഞ്ഞിപ്ര കാട്ടിലെപറമ്പിൽ വീട്ടിൽ നിർമ്മൽ (40) ആണ് പുത്തൻവേലിക്കര പൊലീസ് പിടിയിലായത്.
പുത്തൻവേലിക്കര താഴഞ്ചിറ പാടത്ത് നിന്ന് മൂന്ന് പോത്തുകളെയും ബസാർ ഭാഗത്ത് നിന്ന് മൂന്ന് പോത്തുകളെയും കരിമ്പാടം ഭാഗത്ത് നിന്ന് ഒരു പോത്തിനെയുമാണ് പ്രതി മോഷ്ടിച്ച് കടത്തിക്കൊണ്ടുപോയത്. ലക്ഷങ്ങൾ വിലമതിക്കുന്ന പോത്തുകളാണ് മോഷണം പോയത്.
മോഷണത്തിന് ഉപയോഗിച്ച വാഹനങ്ങളുടെ ഉടമകളും കേസിൽ പ്രതികളാകുമെന്ന് പൊലീസ് അറിയിച്ചു. പുത്തൻവേലിക്കര പൊലീസ് സ്റ്റേഷനിലെ എസ്ഐമാരായ അനീഷ്, മനോജ് കുമാർ, ഗോപി, സീനിയർ സിപിഒ ലിഗിൽ ജോസ്, സിപിഒമാരായ സനൽ, വിനീഷ് എന്നിവരടങ്ങിയ അന്വേഷണ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ നിർമ്മലിനെ റിമാൻഡ് ചെയ്തു.
