സംവിധായകനായി പ്രേക്ഷകരെ ത്രില്ലടിപ്പിച്ച ലോകേഷ് കനകരാജ് ഇനി നായകനായും കയ്യടി നേടുന്നു. അരുൺ മാതേശ്വരൻ സംവിധാനം ചെയ്ത് ലോകേഷ് കനകരാജ് നായകനായെത്തിയ ‘ഡിസി’ തിയറ്ററുകളിൽ. റിലീസ് ചെയ്തതിന് പിന്നാലെ ചിത്രത്തിന് മികച്ച പ്രതികരണമാണ് ലഭിക്കുന്നത്. ഗ്യാങ്സ്റ്റർ ഡ്രാമയായി എത്തിയ ചിത്രത്തിൽ വയലൻസിനും പ്രണയത്തിനുമൊപ്പം വൈകാരിക മുഹൂർത്തങ്ങൾക്കും പ്രാധാന്യമുണ്ടെന്നാണ് പ്രേക്ഷക പ്രതികരണം. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമ്മിച്ചിരിക്കുന്നത്.
എ സർട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നത്. രണ്ട് മണിക്കൂറും 23 മിനിറ്റുമാണ് ദൈർഘ്യം. റിലീസ് ചെയ്ത് ആദ്യ ഘട്ടത്തിൽ തന്നെ ആഗോളതലത്തിൽ 87 കോടി രൂപ ചിത്രം നേടിയെന്നാണ് റിപ്പോർട്ടുകൾ.
കേരളത്തിലും കർണാടകയിലും വമ്പൻ റിലീസായാണ് ‘ഡിസി’ പ്രദർശനത്തിനെത്തിയത്. ശ്രീ ഗോകുലം മൂവീസിന്റെ ബാനറിൽ ശ്രീ ഗോകുലം ഗോപാലനാണ് ചിത്രം അവതരിപ്പിക്കുന്നത്. ഡ്രീം ബിഗ് ഫിലിംസാണ് കേരളത്തിലെയും കർണാടകയിലെയും ഡിസ്ട്രിബ്യൂഷൻ പാർട്നർ.
ചിത്രത്തിൽ ദേവദാസ് എന്ന കഥാപാത്രമായാണ് ലോകേഷ് കനകരാജ് എത്തുന്നത്. വാമിഖ ഗബ്ബിയാണ് നായിക. ചന്ദ്ര എന്ന കഥാപാത്രത്തെയാണ് വാമിഖ അവതരിപ്പിക്കുന്നത്. സഞ്ജന കൃഷ്ണമൂർത്തിയും ചിത്രത്തിൽ പ്രധാന വേഷത്തിലെത്തുന്നു.
റോക്കി, സാനി കായിദം, ക്യാപ്റ്റൻ മില്ലർ എന്നീ ചിത്രങ്ങൾക്ക് ശേഷം അരുൺ മാതേശ്വരൻ സംവിധാനം ചെയ്യുന്ന ചിത്രമാണിത്. അഡീഷണൽ സ്ക്രീൻപ്ലേ അരുൺ രഞ്ജനും, സംഭാഷണം അരുൺ മാതേശ്വരനും ഫ്രാങ്ക്ലിൻ ജേക്കബും ചേർന്നാണ് ഒരുക്കിയിരിക്കുന്നത്.
അനിരുദ്ധ് രവിചന്ദറാണ് സംഗീത സംവിധാനം. മുകേഷ് ജിയാണ് ഛായാഗ്രഹണം. ജി കെ പ്രസന്നയാണ് ചിത്രസംയോജനം. ആക്ഷൻ രംഗങ്ങൾ പിസി സ്റ്റണ്ട്സാണ് ഒരുക്കിയിരിക്കുന്നത്.
വയലൻസിനും പ്രണയത്തിനും പ്രാധാന്യം നൽകുന്ന ചിത്രത്തിൽ വൈകാരിക രംഗങ്ങൾക്കും വലിയ പ്രാധാന്യമുണ്ടെന്നാണ് പ്രേക്ഷക പ്രതികരണങ്ങൾ. സംവിധായകനെന്ന നിലയിൽ ത്രില്ലർ മുഹൂർത്തങ്ങളിലൂടെ ശ്രദ്ധ നേടിയ ലോകേഷ് കനകരാജിന്റെ നായക അരങ്ങേറ്റവും അരുൺ മാതേശ്വരന്റെ സംവിധാനവും ഒരുമിച്ചപ്പോൾ ‘ഡിസി’ പ്രേക്ഷകരിൽ ആകാംക്ഷ സൃഷ്ടിച്ചിരിക്കുകയാണ്.
