വിയ്യൂര് സെന്ട്രല് ജയിലിലെ തടവുകാര്ക്കിടയില് അസിസ്റ്റന്റ് പ്രിസണ് ഓഫിസര് വന്തോതില് ബീഡിക്കച്ചവടം നടത്തുന്നതായി ഡിജിപിക്കു സാക്ഷിമൊഴി സഹിതം റിപ്പോര്ട്ട്. സെല്ലിനുള്ളില്നിന്ന് വലിയ കെട്ട് ബീഡിയുമായി പിടികൂടിയ തടവുകാരന് നല്കിയ മൊഴിയുടെ അടിസ്ഥാനത്തില് സൂപ്രണ്ട് ആണു ജയില്വകുപ്പധ്യക്ഷനു റിപ്പോര്ട്ട് നല്കിയത്. അസി. പ്രിസണ് ഓഫിസറുടെ ഭാര്യയ്ക്കു ഗൂഗിള് പേ വഴിയാണു ബീഡിയുടെ പ്രതിഫലം നല്കാറുള്ളതെന്നു തടവുകാരന്റെ മൊഴിയിലുണ്ട്.
മൊബൈല് ഫോണും ലഹരിവസ്തുക്കളും നിരന്തരമായി ജയിലിനുള്ളിലേക്കു പ്രവഹിക്കുന്നതിനു പിന്നില് ജീവനക്കാരില് ചിലര്ക്കു പങ്കുണ്ടെന്നു നേരത്തേതന്നെ വിവരമുണ്ടായിരുന്നു. അടുക്കളയ്ക്കു പിന്നില് പണിക്കിറക്കിയശേഷം തിരികെ സെല്ലിലെത്തിച്ച തടവുകാരന്റെ കയ്യില്നിന്നാണു 12 പാക്കറ്റ് ബീഡിയടങ്ങുന്ന കെട്ട് പിടിച്ചത്. വിശദമായി ചോദ്യംചെയ്തപ്പോള് പുറത്തുവന്നതു ഞെട്ടിക്കുന്ന വിവരങ്ങള്. 90 പൈസ വിലയുള്ള ഒരു ബീഡിക്കു 10 രൂപയോളമാണ് അസി.പ്രിസണ് ഓഫിസര് ഈടാക്കിയിരുന്നത്. 22 ബീഡി വീതമാണ് ഓരോ പാക്കറ്റിലുള്ളത്. ഇത്തരം 12 പാക്കറ്റുകള് ഉള്പ്പെടുന്നതാണ് ഒരു കെട്ട്. ഓരോ കെട്ടിനും 2500 രൂപ വീതമാണ് ഉദ്യോഗസ്ഥന്റെ നിരക്ക്. 400 രൂപയാണു കെട്ടിന്റെ ശരാശരി വിപണിവില. ജയിലിന്റെ പുറംമതിലിനോടു ചേര്ന്നുള്ള അടുക്കളയുടെ പിന്ഭാഗത്തേക്കു റോഡില്നിന്നു അസി. പ്രിസണ് ഓഫിസര് ബീഡിക്കെട്ട് ഉള്ളിലേക്ക് എറിയുകയാണു പതിവ്.
