കണ്ണൂരില്‍ മദ്യപാനത്തിനിടെയുണ്ടായ തര്‍ക്കത്തില്‍ കത്തിക്കുത്തേറ്റ് ഒരാള്‍ മരിച്ചു. കീരിയാട് സ്വദേശി ടി പി റിയാസ്(43)ആണ് മരിച്ചത്. വ്യാഴം രാത്രി പത്തോടെ മയ്യില്‍ കാട്ടാമ്പള്ളി കൈരളി ബാറിലായിരുന്നു സംഭവം. മദ്യപിച്ചുണ്ടായ തര്‍ക്കത്തിനിടെ അഴീക്കോട് സ്വദേശിയായ നിസാം റിയാസിനെ കുത്തിപരിക്കേല്‍പ്പിക്കുകയായിരുന്നു.
റിയാസും സുഹൃത്തുക്കളും ചേര്‍ന്ന് മദ്യപിക്കുന്നതിനിടെ റിയാസിന്റെ സുഹൃത്തിനെ നിസാം പുറത്തേക്ക് വിളിച്ചു സംസാരിക്കുകയും മര്‍ദിക്കുകയും ചെയ്തിരുന്നു. ഇതേ തുടര്‍ന്ന് സംഭവം ചോദിക്കാനായി ചെന്നപ്പോഴാണ് വാക്കുതര്‍ക്കമുണ്ടായത്. ഇതിനിടെയാണ് നിസാമിന്റെ കുത്തേറ്റ് റിയാസിന്റെ നെഞ്ചിന് മാരകമായി പരിക്കേറ്റത്. ഉടനെ സമീപത്തുണ്ടായിരുന്നവര്‍ കണ്ണൂരിലെ സ്വകാര്യ ആശുപത്രിയില്‍ എത്തിച്ചെങ്കിലും രാവിലെയോടെ മരിക്കുകയായിരുന്നു. ഇതിനിടെ നിസാം സംഭവ സ്ഥലത്തുനിന്നും ഓടിരക്ഷപ്പെട്ടു. മയ്യില്‍ പൊലീസ് കേസെടുത്ത് നിസാമിനായുള്ള അന്വേഷണം ആരംഭിച്ചിട്ടുണ്ട്.
