തൃശൂര് ജില്ലയില് വീണ്ടും മുങ്ങി മരണം. മീന് പിടിക്കാന് പോയപ്പോള് വഞ്ചിമറിഞ്ഞ് യുവാവ് മുങ്ങി മരിച്ചു. ഒപ്പമുണ്ടായിരുന്ന രണ്ടു പേര് നീന്തി രക്ഷപ്പെട്ടു. കല്ലേറ്റുംകര പഞ്ഞപ്പിള്ളി തോപ്പില് പ്രദീപിന്റെ മകന് പ്രണവ് (18) ആണ് മരിച്ചത്. പടിയൂര് വളവനങ്ങാടി കെട്ടുച്ചിറയില് മീന് പിടിക്കാന് പോയപ്പോള് ഒഴുക്കില്പ്പെട്ട് വഞ്ചി മറിഞ്ഞാണ് അപകടം.
വ്യാഴാഴ്ച പുലര്ച്ചെ 3.30നാണ് സംഭവം. ഇരിങ്ങാലക്കുടയില് നിന്ന് ഫയര്ഫോഴ്സ് ടീം എത്തി തിരച്ചില് നടത്തിയെങ്കിലും മരിച്ചിരുന്നു. സ്ക്യൂബ ഡൈവേഴ്സ് അംഗങ്ങളായ ജിമോധും ദിനേഷുമാണ് 20 അടി താഴ്ചയില് നിന്നും മൃതദേഹം മുങ്ങിയെടുത്തത്. പ്രണവ് അമ്മാവന്റെ വീട്ടില് എത്തിയതാണ്. അമ്മാവന് മീന് പിടിക്കാന് പോവാറുണ്ട്. കഴിഞ്ഞ ഞായറാഴ്ച നെടുപുഴ പനമുക്കില് സമാന അപകടം സംഭവിച്ചിരുന്നു. വഞ്ചി മറിഞ്ഞ് നെടുപുഴ ചീക്കോടന് ആഷിക് മരിച്ചിരുന്നു. സുഹൃത്തുക്കള് നീന്തി രക്ഷപ്പെട്ടിരുന്നു.