തിരുവനന്തപുരം: ശബരിമല മണ്ഡലകാല തീർത്ഥാടനത്തിനുള്ള ഒരുക്കങ്ങളിൽ തൃപ്തിയുണ്ടെന്ന് മന്ത്രി കെ. മുരളീധരൻ. തിരക്ക് നിയന്ത്രിക്കാൻ ആവശ്യമായ എല്ലാ ക്രമീകരണങ്ങളും സർക്കാർ ഒരുക്കിയിട്ടുണ്ട്. ദേവസ്വം ബോർഡിന്റെ പ്രവർത്തനങ്ങളിൽ തൃപ്തിയുണ്ടെന്നും ബോർഡ് എല്ലാ കാര്യങ്ങളും സർക്കാരിനെ അറിയിച്ചിട്ടുണ്ടെന്നും മന്ത്രി പറഞ്ഞു.
ദേവസ്വം ബോർഡ് ആസ്ഥാനത്ത് മണ്ഡലകാല ഫെസ്റ്റിവൽ കൺട്രോൾ റൂം തുറന്നു. നവംബർ 16ന് ശബരിമലയിൽ നേരിട്ടെത്തി ഒരുക്കങ്ങൾ വിലയിരുത്തുമെന്നും മന്ത്രി വ്യക്തമാക്കി. ദേവസ്വം ബോർഡിന് സർക്കാരിന്റെ പൂർണ പിന്തുണയുണ്ടെന്നും അദ്ദേഹം കൂട്ടിച്ചേർത്തു.
അതേസമയം, കെപിസിസി അധ്യക്ഷ തിരഞ്ഞെടുപ്പുമായി ബന്ധപ്പെട്ട ചോദ്യങ്ങൾക്കും മന്ത്രി പ്രതികരിച്ചു. മന്ത്രിസഭ പുനഃസംഘടിപ്പിക്കേണ്ട സാഹചര്യമില്ലെന്ന് അദ്ദേഹം വ്യക്തമാക്കി. മന്ത്രിസഭയിൽ നിന്നൊരാൾ കെപിസിസി അധ്യക്ഷ സ്ഥാനത്തേക്ക് എത്തുമോ എന്ന ചോദ്യത്തിന്, ഭാരിച്ച ഉത്തരവാദിത്വങ്ങൾ ഉള്ളതിനാൽ തനിക്ക് ആ സ്ഥാനത്തേക്ക് വരാൻ താൽപര്യമില്ലെന്നായിരുന്നു മറുപടി.
വിദേശത്ത് പഠിച്ചെത്തുന്ന നഴ്സുമാരെക്കുറിച്ചുള്ള പരാമർശത്തിലും അദ്ദേഹം വിശദീകരണം നൽകി. എല്ലാ നഴ്സുമാരെയും ഉദ്ദേശിച്ചല്ല വിമർശനം നടത്തിയതെന്ന് മന്ത്രി പറഞ്ഞു. ആശുപത്രികൾ പോലുമില്ലാത്ത നഴ്സിങ് സ്ഥാപനങ്ങളിൽ പഠിക്കുന്നവരിൽ ചിലർക്ക് പ്രായോഗിക പരിചയക്കുറവുമൂലം പിഴവുകൾ സംഭവിക്കുന്നതിനെക്കുറിച്ചാണ് പറഞ്ഞതെന്നും വ്യക്തമാക്കി. എല്ലാ കാര്യങ്ങളിലും കുറ്റം കണ്ടെത്തുന്ന സമീപനം ശരിയല്ലെന്നും അദ്ദേഹം കൂട്ടിച്ചേർത്തു.
ശബരിമലയിലെ ഒരുക്കങ്ങൾ ശുഷ്കാന്തിയോടെയാണ് മുന്നോട്ടുപോകുന്നത്. അരവണ നിർമാണത്തിൽ ഏർപ്പെട്ടിരിക്കുന്ന ജീവനക്കാർ 24 മണിക്കൂറും ജോലി ചെയ്യുന്നുണ്ട്. തീർത്ഥാടകർക്ക് ആവശ്യമായ സൗകര്യങ്ങൾ ഒരുക്കുകയാണ് ലക്ഷ്യം. ദേവസ്വം ബോർഡ് പ്രസിഡന്റും പ്രായം പരിഗണിക്കാതെ മലകയറി പ്രവർത്തനങ്ങൾ വിലയിരുത്തുന്നുണ്ടെന്നും മന്ത്രി പറഞ്ഞു. മണ്ഡലകാലം അവസാനിച്ച് നട അടച്ചാലുടൻ അടുത്ത വർഷത്തേക്കുള്ള ദീർഘകാല പദ്ധതികൾ തയ്യാറാക്കുമെന്നും അദ്ദേഹം വ്യക്തമാക്കി.
