ന്യൂഡൽഹി: ഒക്ടോബർ 10-ന് ഡൽഹിയിൽ നടക്കാനിരിക്കുന്ന പ്രതിഷേധത്തിന്റെ പശ്ചാത്തലത്തിൽ ട്രെയിൻ സർവീസുകൾ റദ്ദാക്കി ഇന്ത്യൻ റെയിൽവേ. ന്യൂഡൽഹി, ഹസ്രത്ത് നിസാമുദ്ദീൻ റെയിൽവേ സ്റ്റേഷനുകളിൽ എത്തേണ്ട മെയിൽ, എക്സ്പ്രസ് ട്രെയിനുകൾക്കാണ് നിയന്ത്രണം ഏർപ്പെടുത്തിയതെന്നാണ് റിപ്പോർട്ട്.
ഒക്ടോബർ ഒമ്പതിന് ഉച്ചയ്ക്ക് രണ്ടുമണിക്ക് ശേഷം പുറപ്പെടുന്നതും ഒക്ടോബർ 10-ന് പുലർച്ചെ നാലുമുതൽ ഉച്ചയ്ക്ക് രണ്ടുമണിവരെ ഡൽഹിയിലെ സ്റ്റേഷനുകളിൽ എത്തേണ്ടതുമായ ട്രെയിനുകളെ നടപടി ബാധിക്കുമെന്നാണ് വിവരം. സ്റ്റേഷനുകൾക്ക് സമീപം കടുത്ത ഗതാഗതക്കുരുക്കിന് സാധ്യതയുണ്ടെന്ന വിലയിരുത്തലിന്റെ അടിസ്ഥാനത്തിലാണ് തീരുമാനമെന്നാണ് റെയിൽവേ വൃത്തങ്ങൾ നൽകുന്ന വിശദീകരണം.
പ്രതിഷേധത്തെത്തുടർന്ന് യാത്രക്കാർക്ക് ബുദ്ധിമുട്ടുണ്ടാകുന്നത് ഒഴിവാക്കാനും സുരക്ഷ ഉറപ്പാക്കാനുമാണ് മുൻകരുതൽ നടപടിയെന്ന് അധികൃതർ അറിയിച്ചു. മുൻ പ്രതിഷേധങ്ങളിലുണ്ടായ ഗതാഗത തടസ്സങ്ങൾ കാരണം യാത്രക്കാർ സ്റ്റേഷനുകളിൽ കുടുങ്ങിയ സാഹചര്യം ആവർത്തിക്കാതിരിക്കാനാണ് നീക്കമെന്നും റിപ്പോർട്ടുകളുണ്ട്.
ഒക്ടോബർ 10-ന് ജന്തർ മന്തറിൽ കോക്ക്റോച്ച് ജനതാ പാർട്ടി (സി.ജെ.പി.) നടത്താനിരിക്കുന്ന പ്രതിഷേധത്തിന് മുന്നോടിയായി ഡൽഹിയിൽ സുരക്ഷ ശക്തമാക്കിയിട്ടുണ്ട്. ഡൽഹി പൊലീസിനെ സഹായിക്കാൻ കേന്ദ്ര സായുധ പൊലീസ് സേനയുടെ 221 കമ്പനികളിലായി ഏകദേശം 23,000 ഉദ്യോഗസ്ഥരെ വിന്യസിച്ചതായും ഇന്ത്യ ടുഡേ റിപ്പോർട്ട് ചെയ്യുന്നു. ട്രെയിൻ യാത്ര ആസൂത്രണം ചെയ്യുന്നവർ യാത്രയ്ക്ക് മുമ്പ് ബന്ധപ്പെട്ട ട്രെയിനിന്റെ സർവീസ് നില റെയിൽവേയുടെ ഔദ്യോഗിക സംവിധാനങ്ങളിലൂടെ പരിശോധിക്കണം.
