സാധാരണക്കാരുടെ കുടുംബ ബഡ്ജറ്റ് തകർത്ത് രാജ്യത്ത് ഗാർഹിക പാചകവാതക സിലിണ്ടർ വില വീണ്ടും വർദ്ധിപ്പിച്ചു. ഗാർഹിക സിലിണ്ടറിന് 29 രൂപയാണ് കൂട്ടിയത്. ഇന്നലെ അർദ്ധരാത്രിയോടെ പ്രാബല്യത്തിൽ വന്ന പുതുക്കിയ വില ഇന്ന് മുതൽ നിലവിൽ വന്നു. മൂന്ന് മാസത്തിനിടെ ഇത് രണ്ടാം തവണയാണ് ഗാർഹിക സിലിണ്ടറിന്റെ വില വർദ്ധിപ്പിക്കുന്നത്.
പെട്രോൾ, ഡീസൽ വിലവർദ്ധനവിന് പിന്നാലെയാണ് ഇപ്പോൾ ഗാർഹിക സിലിണ്ടറിനും വില കൂട്ടിയിരിക്കുന്നത്. ഇതിന് തൊട്ടുമുമ്പ് 60 രൂപയാണ് വർദ്ധിപ്പിച്ചിരുന്നത്.
പുതുക്കിയ നിരക്കുകൾ പ്രകാരം രാജ്യത്തെ പ്രധാന നഗരങ്ങളിലെ വില ഇങ്ങനെയാണ്:
- ഡൽഹി: 913 രൂപയായിരുന്ന സിലിണ്ടറിന് ഇനി 942 രൂപ നൽകണം.
- കൊൽക്കത്ത: 939 രൂപയിൽ നിന്ന് വില 968 രൂപയായി ഉയർന്നു.
- മുംബൈ: 912 രൂപയായിരുന്നിടത്ത് പുതിയ വില 941 രൂപയാണ്.
പശ്ചിമേഷ്യൻ രാജ്യങ്ങളിൽ സംഘർഷം അയവില്ലാതെ തുടരുന്ന പശ്ചാത്തലത്തിലാണ് രാജ്യാന്തര വിപണിയിലെ പ്രതിസന്ധി ചൂണ്ടിക്കാട്ടിയുള്ള ഈ വിലവർദ്ധനവ്. എന്നാൽ ഇത്രയൊക്കെ വില കൂട്ടിയിട്ടും തങ്ങൾക്ക് മുന്നോട്ടുപോകാൻ വല്ലാത്ത പ്രയാസമാണെന്നാണ് എണ്ണ കമ്പനികളുടെ വാദം.
അതേസമയം, വാണിജ്യ സിലിണ്ടറുകളുടെ വില നേരത്തെ തന്നെ കുത്തനെ കൂടിയതോടെ രാജ്യത്ത് ഹോട്ടൽ ഭക്ഷണസാധനങ്ങളുടെ വിലയും കുതിച്ചുയരുകയാണ്. ഇതിന് പിന്നാലെ അടുക്കളകളിലേക്കും വിലക്കയറ്റം നേരിട്ടെത്തുന്നത് ജനജീവിതം കൂടുതൽ ദുസ്സഹമാക്കും.
