തിരുവനന്തപുരം: ഒന്നാം ക്ലാസില്‍ പ്രവേശനം നേടിയ കുട്ടികളുടെ എണ്ണത്തില്‍ ഇക്കുറി കുറവുണ്ടായെന്ന് സംസ്ഥാന സര്‍ക്കാരിന്റെ കണക്ക്. ഒന്നാം ക്ലാസില്‍ 45573 കുട്ടികളുടെ കുറവാണ് ഉണ്ടായത്. സര്‍ക്കാര്‍/ എയ്ഡഡ്/ അണ്‍എയ്ഡഡ് സ്‌കൂളുകളില്‍ ഒരുപോലെ കുറവുണ്ടായിട്ടുണ്ട്. കഴിഞ്ഞ വര്‍ഷം ഒന്നാം ക്ലാസില്‍ ആകെ പ്രവേശനം നേടിയത് 348741 കുട്ടികളാണ്. ഇത്തവണ 303168 പേര്‍ മാത്രമാണ് മുഴുവന്‍ സ്‌കൂളുകളിലുമായി പ്രവേശനം നേടിയത്. സര്‍ക്കാര്‍ / എയ്ഡഡ് സ്‌കൂളുകളില്‍ മാത്രം ഈ വര്‍ഷം ഒന്നാം ക്ലാസില്‍ 37522 കുട്ടികളുടെ കുറവുണ്ട്. രണ്ടു മുതല്‍ 10 വരെ ക്ലാസുകളില്‍ സര്‍ക്കാര്‍ സ്‌കൂളുകളില്‍ 119970 കുട്ടികള്‍ വര്‍ധിച്ചു. അധ്യയന വര്‍ഷം ആരംഭിച്ച് ആറാമത്തെ പ്രവൃത്തി ദിവസത്തെ കുട്ടികളുടെ ഹാജര്‍ നില അടിസ്ഥാനമാക്കിയുള്ളതാണ് സര്‍ക്കാര്‍ പുറത്തുവിട്ട കണക്ക്. വിദ്യാഭ്യാസ മന്ത്രി നിയമസഭയെ രേഖാമൂലം അറിയിച്ച കണക്കാണിത്.
