വിവാഹശേഷം 15ാം വര്‍ഷം ഒരു രജിസ്‌ട്രേഷന്‍, അതും ദമ്പതികളുടെ മരണശേഷം. തിരുവനന്തപുരം മുല്ലൂര്‍ സ്വദേശിനി ജോളി പി ദാസിന്റെയും എസ് അജികുമാറിന്റെയും 2008ല്‍ നടന്ന വിവാഹം രജിസ്റ്റര്‍ ചെയ്യാനാണ് തദ്ദേശ വകുപ്പ് ഡെപ്യൂട്ടി സെക്രട്ടറി ഉത്തരവിറക്കിയത്. ജോളിയുടെ അച്ഛന്‍ കെ ജ്ഞാനദാസിന്റെ അപേക്ഷയിലാണ് ഉത്തരവ്.
2008 ആഗസ്ത് 28നാണ് ജോളി പി ദാസും എസ് അജികുമാറും വിവാഹിതരായത്. മുല്ലൂര്‍ സിഎസ്‌ഐ ചര്‍ച്ചില്‍ നടന്ന വിവാഹം പഞ്ചായത്തില്‍ രജിസ്റ്റര്‍ ചെയ്തിരുന്നില്ല. 2012ല്‍ ജോളിയും 2018ല്‍ അജികുമാറും മരിച്ചു. ഇവരുടെ ഏകമകനായ പതിനാലുകാരന്‍ മുത്തച്ഛന്‍ ജ്ഞാനദാസിനൊപ്പമാണ് കഴിയുന്നത്. കുട്ടിയുടെ ഭാവി ആവശ്യങ്ങള്‍ക്കായി മാതാപിതാക്കളുടെ വിവാഹസര്‍ട്ടിഫിക്കറ്റ് ആവശ്യമായതോടെയാണ് രജിസ്റ്റര്‍ ചെയ്യാന്‍ അനുമതി തേടി ജ്ഞാനദാസ് സര്‍ക്കാരില്‍ അപേക്ഷിച്ചത്. ആദ്യം തിരുവനന്തപുരം നഗരസഭയുടെ വിഴിഞ്ഞം സോണല്‍ ഓഫീസില്‍ അപേക്ഷിച്ചെങ്കിലും സര്‍ക്കാരിന്റെ പ്രത്യേക അനുമതി വാങ്ങണമെന്ന് മറുപടി ലഭിച്ചു. തുടര്‍ന്നാണ് രജിസ്‌ട്രേഷന്‍ നടത്താന്‍ അപേക്ഷിക്കുകയും സര്‍ക്കാര്‍ അനുമതി നല്‍കുകയും ചെയ്തത്.
‘വര്‍ഷങ്ങളായി ഞാന്‍ ഇതിനുപിറകെയായിരുന്നു. ഇപ്പോള്‍ വിവാഹം രജിസ്റ്റര്‍ ചെയ്യാന്‍ ഉത്തരവായെന്നറിയുന്നതില്‍ അതീവ സന്തോഷമുണ്ട്’- ജ്ഞാനദാസ് പറഞ്ഞു. ജോളിയുടെ മരണശേഷം വീണ്ടും വിവാഹിതനായ അജികുമാറിന് ഒരു കുട്ടികൂടിയുണ്ട്. ഇവര്‍ മറ്റൊരിടത്താണ് താമസം. ജോളി-അജികുമാര്‍ ദമ്പതികളുടെ വിവാഹം നടന്നത് 2008ലെ കേരള വിവാഹങ്ങള്‍ രജിസ്റ്റര്‍ ചെയ്യല്‍ (പൊതു) ചട്ടങ്ങള്‍ നിലവില്‍ വന്നശേഷമാണ്. മാതാപിതാക്കള്‍ നഷ്ടമായ കുട്ടിക്ക് ഭാവിയിലെ വിവിധ ആവശ്യങ്ങള്‍ക്കായി അവരുടെ വിവാഹ സര്‍ട്ടിഫിക്കറ്റ് ആവശ്യമായി വരുമെന്നതിനാലാണ് അപേക്ഷ പരിഗണിക്കാന്‍ വകുപ്പ് തീരുമാനിച്ചത്.
