തൊടുപുഴയില്‍ പതിനൊന്നുകാരിയെ സാമൂഹ്യമാധ്യമങ്ങളിലൂടെ വില്‍പ്പനയ്ക്ക് വച്ചത് രണ്ടാനമ്മയെന്ന് പൊലീസ്. പിതാവിന്റെ ഫേസ്ബുക്കിലൂടെയാണ് പതിനൊന്നുകാരിയെ വില്‍പനയ്‌ക്കെന്ന പോസ്റ്റിടുന്നത്. ഇവര്‍ പോസ്റ്റിടാനുപയോ?ഗിച്ച മൊബൈല്‍ ഫോണ്‍ കസ്റ്റഡിയിലെടുത്തിട്ടുണ്ട്. സൈബര്‍ സെല്ലിന്റെ സഹായത്തോടെ പോസ്റ്റിട്ട ഐപി ആഡ്രസ് ശേഖരിച്ചാണ് പ്രതി രണ്ടാനമ്മയാണെന്ന് തിരിച്ചറിഞ്ഞത്.
പെണ്‍കുട്ടിയുടെ പിതാവുമായുള്ള വഴക്കിനെ തുടര്‍ന്നാണ് പോസ്റ്റിട്ടതെന്ന് ഇവര്‍ പൊലീസിനോട് പറഞ്ഞു. കുട്ടിയുടെ പിതാവിന്റെ പേരില്‍ പല കേസുകളുമുണ്ട്. രണ്ടാനമ്മയ്ക്ക് 6 മാസം പ്രായമുള്ള കുഞ്ഞുള്ളതിനാല്‍ ഇവരെ അറസ്റ്റ് ചെയ്യുന്ന കാര്യത്തില്‍ ചൈല്‍ഡ് വെല്‍ഫെയര്‍ കമ്മിറ്റിയുടെ ഉപദേശം തേടിയിട്ടുണ്ട്. കഴിഞ്ഞ ദിവസമാണ് കുട്ടിയുടെ പിതാവിന്റെ ഫേസ്ബുക്കില്‍ പതിനൊന്നുകാരിയായ മകളെ വില്‍ക്കാനുണ്ടെന്ന തരത്തില്‍ ഫേസ്ബുക്കില്‍ പോസ്റ്റ് വന്നത്. സംഭവം വിവാദമായതിനെതുടര്‍ന്ന് പോസ്റ്റ് പിന്‍വലിച്ചിരുന്നു.
