താനൂര്‍: ആള്‍മാറാട്ടം നടത്തി പണവും വാഹനങ്ങളും മോഷ്ടിക്കുന്ന യുവാവ് പിടിയില്‍. കൂട്ടായി പുതിയ വീട്ടില്‍ അബ്ദുല്‍ ജംഷിയാണ് (43) അറസ്റ്റിലായത്. പൊലീസ് സംഘം തുടര്‍ച്ചയായി നടത്തിയ അന്വേഷണത്തിലാണ് ഇയാള്‍ വലയിലായത്. മൂന്നാഴ്ച മുന്‍പ് മോര്യയിലെ സജീഷിന്റെ മോട്ടര്‍ബൈക്ക് റെയില്‍വേ സ്റ്റേഷനു സമീപത്തു നിന്ന് മോഷണം പോയിരുന്നു. തുടര്‍ന്ന് സിസിടിവികള്‍ പരിശോധിച്ചു അന്വേഷണവും ആരംഭിച്ചിരുന്നു. മാസ്‌ക് ധരിച്ചതിനാല്‍ മോഷ്ടാവിനെ തിരിച്ചറിയാന്‍ സാധിച്ചിരുന്നില്ല.
മോഷ്ടിച്ച ബൈക്ക് ചമ്രവട്ടത്ത് ടൂ വീലര്‍ വര്‍ക്ക് ഷോപ്പില്‍ ഏല്‍പിച്ചതായി കണ്ടെത്തി. 2023ല്‍ സമാന രീതിയിലുള്ള കുറ്റകൃത്യത്തിനു പാലക്കാട് കല്ലടിക്കോട്, ചാലിശ്ശേരി പൊലീസ് സ്റ്റേഷനുകളിലെ കേസുകളില്‍ ഉള്‍പ്പെട്ട് കോടതിയില്‍ നിന്ന് ജാമ്യത്തില്‍ ഇറങ്ങി മുങ്ങി നടക്കുകയാണെന്ന് പൊലീസ് പറഞ്ഞു. പ്രതിക്കെതിരെ വാറന്റും നിലവിലുണ്ട്. പ്രതി പാലക്കാട്, മലപ്പുറം, കോഴിക്കോട് ജില്ലകളില്‍ ഒട്ടേറെ തട്ടിപ്പുകളും പണവുമായി കടന്നു കളയുന്ന ജംഷിയാണെന്ന് അന്വേഷണ സംഘത്തിന് സൂചന ലഭിച്ചു.
വിവിധ കേന്ദ്രങ്ങളില്‍ താമസിച്ചു തട്ടിപ്പ് നടത്തിയ പ്രതിയെ കഴിഞ്ഞ ദിവസം കോഴിക്കോട് വച്ചാണ് അന്വേഷണസംഘം പിടികൂടിയത്. സംസാരിച്ച് ആളുകളെ വശീകരിക്കുന്നതില്‍ സമര്‍ഥനാണ് പ്രതി. വയനാട് ദുരിത മേഖലയിലെത്തി ഒറ്റപ്പെട്ടവരായ സ്ത്രീകള്‍ക്ക് വിവാഹ വാഗ്ദാനം നല്‍കി പണം തട്ടിയ കേസുകളും ഇയാളുടെ പേരിലുണ്ട്.
ഡിവൈഎസ്പി പി. പ്രമോദിന്റെ നേതൃത്വത്തില്‍ ഇന്‍സ്പെക്ടര്‍ ടോണി ജെ.മറ്റം, സബ് ഇന്‍സ്പെക്ടര്‍മാരായ എന്‍.ആര്‍ സുജിത്, പ്രമോദ്, എഎസ്‌ഐ സലേഷ്, സിപിഒമാരായ ബീജോയ്, വിപീഷ്, പ്രഭീഷ്, ലിബിന്‍ എന്നിവര്‍ അടങ്ങിയ സംഘമാണ് അന്വേഷണം നടത്തിയത്. പ്രതിയെ പരപ്പനങ്ങാടി കോടതിയില്‍ ഹാജരാക്കി റിമാന്‍ഡ് ചെയ്തു.
