തിരുവനന്തപുരം: സംസ്ഥാനത്ത് ഭരണവും മന്ത്രിമാരും മാറിയിട്ടും വനിതാ ശിശു വികസന വകുപ്പ് അതൊന്നും അറിഞ്ഞ മട്ടില്ലെന്ന് ആക്ഷേപം. വകുപ്പ് തയ്യാറാക്കി അങ്കണവാടി കുട്ടികൾക്ക് വിതരണം ചെയ്ത കൈപ്പുസ്തകത്തിൽ ഇപ്പോഴും മുൻ മന്ത്രി വീണാ ജോർജിന്റെ ചിത്രവും ആശംസാ സന്ദേശവുമാണ് അച്ചടിച്ചിരിക്കുന്നത്. ‘അങ്കണപ്പൂമഴ’ എന്ന പേരിൽ പുറത്തിറക്കിയ പ്രവർത്തന പുസ്തകത്തിലാണ് ഈ ഗുരുതര വീഴ്ച സംഭവിച്ചിരിക്കുന്നത്.
സംസ്ഥാനത്ത് പുതിയ സർക്കാർ അധികാരമേൽക്കുകയും ബിന്ദു കൃഷ്ണ വനിതാ ശിശുവികസന വകുപ്പ് മന്ത്രിയായി ചുമതലയേൽക്കുകയും ചെയ്തിട്ടും, നിലവിലെ മന്ത്രിയുടെ ചിത്രമോ പേരോ പുസ്തകത്തിൽ ഒരിടത്തുമില്ല. ഇന്നലെ നടന്ന അങ്കണവാടി പ്രവേശനോത്സവത്തിലാണ് കുട്ടികൾക്ക് ഈ പുസ്തകം വിതരണം ചെയ്തത്. ഇതോടെ, വകുപ്പിൽ ഭരണം മാറിയ വിവരം ഉദ്യോഗസ്ഥർ അറിഞ്ഞില്ലേ എന്ന രീതിയിൽ സമൂഹമാധ്യമങ്ങളിൽ പരിഹാസം ശക്തമാവുകയാണ്. മുൻ സർക്കാരിന്റെ കാലത്ത് അച്ചടിച്ചു വെച്ചിരുന്ന പുസ്തകങ്ങൾ യാതൊരുവിധ തിരുത്തലുകളും വരുത്താതെ അപ്പടി വിതരണം ചെയ്തതാണ് ഈ വിവാദത്തിന് കാരണമായതെന്നാണ് സംശയിക്കുന്നത്. പുതിയ മന്ത്രി ചുമതലയേറ്റിട്ടും പുസ്തകത്തിലെ മന്ത്രിയുടെ സന്ദേശവും ചിത്രവും മാറ്റാൻ ഉദ്യോഗസ്ഥർ തയ്യാറാകാതിരുന്നത് വലിയ വീഴ്ചയായാണ് വിലയിരുത്തപ്പെടുന്നത്.
