കോഴിക്കോട് കൊയിലാണ്ടി കീഴരിയൂർ പഞ്ചായത്തിൽ തെരുവുനായയുടെ ആക്രമണത്തിൽ പരിക്കേറ്റ യുവതിക്ക് 52,000 രൂപ നഷ്ടപരിഹാരം നൽകാൻ പഞ്ചായത്ത് ഭരണസമിതി തീരുമാനിച്ചു. 2014 മാർച്ചിൽ നടുവത്തൂർ കുറുമയിൽ താഴെ റോഡിൽ വെച്ചാണ് അമൃതപ്രിയ ലാലീസ് എന്ന യുവതിക്ക് തെരുവുനായയുടെ കടിയേറ്റത്.
തുടർന്ന് യുവതി കോടതിയെ സമീപിച്ചിരുന്നു. നഷ്ടപരിഹാരം നൽകാൻ ജില്ലാ ലീഗൽ സർവീസസ് സൊസൈറ്റിയുടെ സ്ട്രേ ഡോഗ് വിക്ടിം കോംപൻസേഷൻ റെക്കമൻഡേഷൻ കമ്മിറ്റി ഉത്തരവിട്ടതിനെ തുടർന്നാണ് പഞ്ചായത്തിന്റെ നടപടി. കഴിഞ്ഞ ദിവസം ചേർന്ന ഭരണസമിതി യോഗത്തിലാണ് തുക കൈമാറാൻ തീരുമാനിച്ചത്.
തെരുവുനായകളുടെ നിയന്ത്രണത്തിനായി കൂടുതൽ നടപടികൾ സ്വീകരിക്കുമെന്നും വളർത്തുനായകൾക്ക് ലൈസൻസ് ഏർപ്പെടുത്തുന്നതിൽ കർശന നടപടി സ്വീകരിക്കുമെന്നും പഞ്ചായത്ത് പ്രസിഡന്റ് പി.കെ. ബാബു അറിയിച്ചു.
