നാഗാലാൻഡിൽ വ്യാജമദ്യം കഴിച്ച് 19 പേർ മരിച്ചു. കഴിഞ്ഞ രണ്ട് ദിവസത്തിനിടെ മൊകോക്ചുങ്, ടുൻസാങ് ജില്ലകളിലാണ് മരണങ്ങൾ റിപ്പോർട്ട് ചെയ്തത്. മൊകോക്ചുങിൽ എട്ട് പേരും ടുൻസാങിൽ 11 പേരുമാണ് മരിച്ചത്.
സംഭവത്തിൽ അന്വേഷണം നടത്താനും മായം ചേർത്തതെന്ന് സംശയിക്കുന്ന മദ്യത്തിന്റെ ഉറവിടവും വിതരണ ശൃംഖലയും കണ്ടെത്താനുമായി പ്രത്യേക അന്വേഷണ സംഘം രൂപീകരിച്ചു. അഡീഷണൽ സൂപ്രണ്ട് ഓഫ് പൊലീസ് ഐ. ബങ്ലാങ് ചാങിന്റെ നേതൃത്വത്തിലാണ് എസ്.ഐ.ടി അന്വേഷണം നടത്തുന്നത്.
മരണങ്ങളെ തുടർന്ന് പൊലീസ് നടത്തിയ വ്യാപക പരിശോധനയിൽ 19 പേരെ അറസ്റ്റ് ചെയ്തു. ഏകദേശം 3,000 കുപ്പി മദ്യവും പിടിച്ചെടുത്തു.
1990 മുതൽ നാഗാലാൻഡിൽ മദ്യനിരോധനം നിലവിലുണ്ട്. തിരിച്ചറിയാനാകാത്തതോ ലേബൽ ഇല്ലാത്തതോ അനധികൃതമെന്ന് സംശയിക്കുന്നതോ ആയ മദ്യം ഉപയോഗിക്കരുതെന്ന് പൊലീസ് മുന്നറിയിപ്പ് നൽകി.
മദ്യം കഴിച്ചതിന് പിന്നാലെ തലകറക്കം, കാഴ്ച മങ്ങൽ, ശ്വാസതടസ്സം, ബോധക്ഷയം തുടങ്ങിയ ലക്ഷണങ്ങൾ അനുഭവപ്പെട്ടാൽ ഉടൻ വൈദ്യസഹായം തേടണമെന്നും പൊലീസ് നിർദേശിച്ചു.
