ആലപ്പുഴ ആലപ്പുഴയില്‍ നവജാത ശിശുവിന് ഗുരുതര വൈകല്യമുണ്ടായ സംഭവത്തില്‍ നാല് ഡോക്ടര്‍മാര്‍ക്കെതിരെ കേസെടുത്തു. ആലപ്പുഴ വനിതാ ശിശു ആശുപത്രിയിലെ ഗൈനക്കോളജിസ്റ്റ്മാരായ ഡോ. പുഷ്പ, ഷേര്‍ലി എന്നിവര്‍ക്കും സ്വകാര്യ ലാബിലെ രണ്ട് ഡോക്ടര്‍മാര്‍ക്കുമെതിരെയാണ് കേസെടുത്തത്. ആലപ്പുഴ സൗത്ത് പൊലീസാണ് കേസെടുത്തിരിക്കുന്നത്.
ലജനത്ത് വാര്‍ടില്‍ അനീഷ് സുറുമി ദമ്പതികളുടെ കുഞ്ഞിനാണ് വൈകല്യം.
നവജാത ശിശുവിന് ഗുരുതര വൈകല്യങ്ങളാണ് ഉള്ളത്. യഥാസ്ഥാനത്തല്ല കുഞ്ഞിന്റെ ചെവിയും കണ്ണും ഉള്ളത്. വായ തുറക്കുന്നില്ല. കുഞ്ഞിന്റെ നാവ് മലര്‍ത്തികിടത്തിയാല്‍ ഉള്ളിലേക്ക് പോകും. കാലിനും കൈക്കും വളവുമുണ്ട്. ഗര്‍ഭകാലത്ത് പലതവണ സ്‌കാനിംഗ് നടത്തിയെങ്കിലും സ്‌കാനിംഗില്‍ ഡോക്ടര്‍മാര്‍ വൈകല്യം തിരിച്ചറിഞ്ഞില്ലെന്നാണ് കുട്ടിയുടെ അമ്മയുടെ പരാതി.
ഡോക്ടര്‍ ഇല്ലാതെയാണ് സ്വകാര്യ ലാബില്‍ പരിശോധന നടത്തിയതെന്നും കണ്ടെത്തിയിട്ടുണ്ട്.
എന്നാല്‍ ഡോക്ടറുടെ ഒപ്പും സീലും നല്‍കി. പൊലീസ് രഹസ്യ അന്വേഷണ വിഭാഗത്തിന്റെ അന്വേഷണത്തിലാണ് ഡോക്ടര്‍ ഇല്ലാതെയുള്ള സ്വകാര്യ ലാബിലെ പരിശോധന കണ്ടെത്തിയത്.
