തിരുവനന്തപുരം മലയിൻകീഴിൽ വ്യാപക മോഷണവും അക്രമവും. മൂന്ന് ക്ഷേത്രങ്ങളിലും ഒരു വീട്ടിലുമാണ് മോഷണം നടന്നത്. വീട്ടുടമയെ കമ്പിപ്പാര കൊണ്ട് തലയ്ക്കടിച്ച് പരുക്കേൽപ്പിച്ച ശേഷമാണ് മോഷ്ടാക്കൾ പണം കവർന്നത്.
വാറുവിളാകം ശിവനായക നാഗേശ്വര ക്ഷേത്രം, ആൽത്തറ ഭഗവതി ക്ഷേത്രം, ഇരട്ടക്കിടങ്ങ് ഭഗവതി ക്ഷേത്രം എന്നിവിടങ്ങളിലാണ് മോഷണം നടന്നത്. ഞായറാഴ്ച അർധരാത്രിയോടെയായിരുന്നു സംഭവം. ക്ഷേത്രങ്ങളിലെ തിടപ്പള്ളിയും അന്നദാനപ്പെട്ടിയും കൗണ്ടറുകളും തല്ലിപ്പൊളിച്ചാണ് പണം കവർന്നത്.
പൊറ്റയിലെ വീട്ടിലും മോഷ്ടാക്കൾ അതിക്രമിച്ചുകയറി. സിനിമ കണ്ടശേഷം അർധരാത്രിയോടെ വീട്ടിലെത്തിയ ഉടമയെ ഒളിച്ചിരുന്ന മോഷ്ടാവ് കമ്പിപ്പാര കൊണ്ട് തലയ്ക്കടിക്കുകയായിരുന്നു. തുടർന്ന് അലമാര കുത്തിത്തുറന്ന് അയ്യായിരം രൂപ മോഷ്ടിച്ചു. രണ്ടുപേരാണ് മോഷണത്തിന് പിന്നിലെന്നും ഇരുവരും സ്കൂട്ടറിൽ കടന്നുകളഞ്ഞെന്നുമാണ് വീട്ടുടമയുടെ മൊഴി.
സംഭവത്തിൽ പൊലീസ് അന്വേഷണം ഊർജിതമാക്കി. മലയാളികളായ മോഷ്ടാക്കളെ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.
