മുൻ മുഖ്യമന്ത്രി പിണറായി വിജയന്റെ നവകേരള യാത്രയ്ക്കിടെ ആലപ്പുഴയിൽ വെച്ച് യൂത്ത് കോൺഗ്രസ്-കെഎസ്യു പ്രവർത്തകരെ ഗൺമാൻമാർ ക്രൂരമായി മർദ്ദിച്ച സംഭവത്തിൽ പുനരന്വേഷണത്തിന് ഉത്തരവ്. കേസ് അന്വേഷണത്തിനായി പ്രത്യേക അന്വേഷണ സംഘത്തെ (SIT) രൂപീകരിച്ചു. വി.ഡി സതീശൻ മുഖ്യമന്ത്രിയായി അധികാരമേറ്റതിന് പിന്നാലെയാണ് ആഭ്യന്തര വകുപ്പിന്റെ നിർണായക നീക്കം.
കേരള രാഷ്ട്രീയത്തിൽ വൻ വിവാദമുയർത്തിയ നവകേരള സദസ്സ് മർദ്ദനക്കേസിലാണ് ഇപ്പോൾ പുതിയ സർക്കാർ അധികാരമേറ്റതിന് പിന്നാലെ പുനരന്വേഷണം പ്രഖ്യാപിച്ചിരിക്കുന്നത്. ആലപ്പുഴ ക്രൈംബ്രാഞ്ച് എസ്പി ഷൗക്കത്തലിയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് (SIT) കേസ് അന്വേഷിക്കുക. പതിനഞ്ച് ദിവസത്തിനകം അന്വേഷണം പൂർത്തിയാക്കി റിപ്പോർട്ട് സമർപ്പിക്കാനാണ് വി.ഡി സതീശൻ സർക്കാർ നിർദേശം നൽകിയിട്ടുള്ളത്.
2023 ഡിസംബറിലാണ് കേരളത്തെ പിടിച്ചുലച്ച സംഭവം അരങ്ങേറിയത്. നവകേരള യാത്രയ്ക്കിടെ ആലപ്പുഴയിൽ വെച്ച് കറുത്ത കൊടി കാണിച്ച യൂത്ത് കോൺഗ്രസ്-കെഎസ്യു പ്രവർത്തകരെ മുഖ്യമന്ത്രി പിണറായി വിജയന്റെ അകമ്പടി വാഹനത്തിൽ നിന്നിറങ്ങിവന്ന ഗൺമാൻമാർ ക്രൂരമായി മർദ്ദിക്കുകയായിരുന്നു. ഗൺമാൻമാരായ അനിൽ കുമാറും സന്ദീപ് എസും ചേർന്ന് പ്രവർത്തകരെ ലത്തി കൊണ്ടുൾപ്പെടെ തലങ്ങും വിലങ്ങും അടിക്കുന്ന ദൃശ്യങ്ങൾ മാധ്യമങ്ങളിലൂടെ പുറത്തുവന്നിരുന്നു.
അന്ന് മുഖ്യമന്ത്രിയായിരുന്ന പിണറായി വിജയൻ ഗൺമാൻമാരുടെ ഈ ക്രൂരതയെ പരസ്യമായി ന്യായീകരിച്ചത് കോൺഗ്രസ് നേതൃത്വത്തിലും അണികൾക്കിടയിലും വലിയ പ്രതിഷേധത്തിന് കാരണമായിരുന്നു. പോലീസിനെ മുൻനിർത്തി അക്രമികളെ സംരക്ഷിക്കുന്ന നിലപാടാണ് മുൻ സർക്കാർ സ്വീകരിച്ചതെന്ന ആക്ഷേപം ശക്തമായിരുന്നു. എന്നാൽ സംസ്ഥാനത്ത് ഭരണം മാറി വി.ഡി സതീശന്റെ നേതൃത്വത്തിൽ പുതിയ സർക്കാർ അധികാരമേറ്റതോടെയാണ് കേസിൽ കൃത്യമായ അന്വേഷണത്തിന് വഴിതുറന്നിരിക്കുന്നത്. 15 ദിവസത്തിനകം എസ്പി ഷൗക്കത്തലിയുടെ നേതൃത്വത്തിലുള്ള സംഘം സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ മുൻ മുഖ്യമന്ത്രിയുടെ ഗൺമാൻമാർക്കെതിരെ കടുത്ത നടപടികളിലേക്ക് രാജ്യം നീങ്ങുമെന്നാണ് സൂചന.
