മലപ്പുറത്ത് നിറത്തിന്റെ പേരില്‍ പീഡിപ്പിക്കപ്പെട്ട യുവതി ആത്മഹത്യ ചെയ്ത കേസില്‍ ഭര്‍ത്താവ് പിടിയില്‍. ആത്മഹത്യ പ്രേരണക്കുറ്റം ഉള്‍പ്പെടെയുള്ള വകുപ്പുകള്‍ ചുമത്തിയായിരുന്നു അബ്ദുള്‍ വാഹിദിനെതിരെ പൊലീസ് കേസെടുത്തിരുന്നത്. പ്രതി അബ്ദുള്‍ വാഹിദ് കണ്ണൂര്‍ വിമാനത്താവളത്തില്‍ നിന്നാണ് പിടിയിലായത്. എമിഗ്രെഷന്‍ വിഭാഗം പിടികൂടിയ പ്രതിയെ കൊണ്ടോട്ടി പോലീസിന് കൈമാറി. നേരത്തെ ലുക്ക്ഔട്ട് നോട്ടീസ് പുറത്തിറക്കിയിരുന്നു.
ഈ മാസം 14നാണ് ഷഹാന മുംതാസിനെ സ്വന്തം വീട്ടില്‍ തൂങ്ങിമരിച്ച നിലയില്‍ കണ്ടെത്തിയത്. നിറം കുറവാണെന്ന് പറഞ്ഞു ഭര്‍ത്താവും കുടുംബവും പെണ്‍കുട്ടിയെ വിവാഹ ബന്ധം വേര്‍പ്പെടുത്താന്‍ നിര്‍ബന്ധിച്ചതാണ് ആത്മഹത്യക്ക് കാരണമെന്ന് കുടുംബം ആരോപിച്ചിരുന്നു. ഭര്‍ത്താവിന്റെയും കുടുംബത്തിന്റെയും മാനസിക പീഡനമാണ് ആത്മഹത്യക്ക് പിന്നില്‍ എന്നായിരുന്നു കുടുംബം ആരോപിച്ചത്. കുടുംബത്തിന്റെ പരാതിയിലാണ് പൊലീസ് കേസെടുത്തത്.
ഇംഗ്ലീഷ് സംസാരിക്കാന്‍ അറിയില്ലെന്നും ഷഹാനക്ക് നിറമില്ലെന്നും ആരോപിച്ച് വിവാഹ ബന്ധം വേര്‍പ്പെടുത്താന്‍ ഭര്‍ത്താവ് അബ്ദുല്‍ വാഹിദും കുടുംബവും നിര്‍ബന്ധിച്ചിരുന്നു എന്ന് സഹോദരന്‍ പറഞ്ഞിരുന്നു. 2024 മെയ് 27 ന് ആണ് ഷഹാന മുംതാസും-മൊറയൂര്‍ സ്വദേശി അബ്ദുല്‍ വാഹിദും തമ്മിലുള്ള വിവാഹം നടന്നത്. 20 ദിവസം ഒരുമിച്ചു കഴിഞ്ഞ ശേഷം അബ്ദുല്‍ വാഹിദ് വിദേശത്തേക്ക് പോയി. പിന്നാലെയാണ് പ്രശ്‌നങ്ങള്‍ തുടങ്ങിയത്.
