മാനന്തവാടി: വയനാട് മാനന്തവാടി പഞ്ചാരക്കൊല്ലിയില് ജനങ്ങളെ ഭീതിയിലാഴ്ത്തിയ കടുവ ചത്തു. രാധയെന്ന സ്ത്രീയെ കൊലപ്പെടുത്തി ഭക്ഷിച്ച നരഭോജിക്കടുവയാണ് ചത്തതെന്നാണ് പ്രാഥമിക നിഗമനം. ഓപ്പറേഷനിടയില് ദൗത്യസംഘമാണ് ചത്തനിലയില് കടുവയെ കണ്ടെത്തിയത്. കടുവ ചത്ത വിവരം വനംവകുപ്പ് സ്ഥിരീകരിച്ചു. രാധയുടെ കൊലയ്ക്ക് ശേഷം വലിയ ജനകീയ പ്രതിഷേധങ്ങള്ക്കും തെരച്ചിലിനും വിവാദങ്ങള്ക്കും ഒടുവിലാണ് നാലാംനാള് കടുവയുടെ മൃതദേഹം ലഭിക്കുന്നത്.
ദൗത്യസംഘത്തിന്റെ നൈറ്റ് പട്രോളിംഗിനിടെ പുലര്ച്ചെ 2.30ഓടെയാണ് കടുവയെ ചത്ത നിലയില് കണ്ടെത്തിയത്. കടുവയുടെ മരണകാരണം അറിയാന് വിശദമായ പോസ്റ്റ്മോര്ട്ടം വേണ്ടിവരുമെന്ന് വനംവകുപ്പ് അറിയിച്ചു. പോസ്റ്റ്മോര്ട്ടം നടപടികള് ഇന്നുതന്നെ പൂര്ത്തീകരിക്കും. കടുവ ചത്തതില് വലിയ ആശ്വാസമുണ്ടെന്ന് കൊല്ലപ്പെട്ട രാധയുടെ ഭര്ത്താവ് അച്ചപ്പന് പറഞ്ഞു. കടുവയുടെ ദേഹത്ത് ആഴത്തിലുള്ള മുറിവുകളുണ്ടെന്നാണ് പ്രാഥമിക പരിശോധനയില് കണ്ടെത്തിയിരിക്കുന്നത്.
