ആറന്മുളയില്‍ മൂന്നാംക്ലാസ് വിദ്യാര്‍ഥിനിയുടെ കൈകളില്‍ ചൂരല്‍ ഉപയോഗിച്ച് ക്രൂരമായി അടിച്ചു പരുക്കേല്‍പിച്ചെന്ന കേസില്‍ അധ്യാപകനെ അറസ്റ്റ് ചെയ്തു. ഇടയാറന്മുള എരുമക്കാട് കെഡിഎം ഗവ. എല്‍പി സ്‌കൂള്‍ അധ്യാപകന് മെഴുവേലി ആലക്കോട് ബിനോജ് കുമാറാണ് (45) അറസ്റ്റിലായത്. സംഭവത്തില്‍ അധ്യാപകനെ മന്ത്രി വി.ശിവന്‍കുട്ടിയുടെ നിര്‍ദേശപ്രകാരം സസ്‌പെന്‍ഡ് ചെയ്തു.
ക്ലാസില്‍ പഠിപ്പിച്ച കണക്ക് നോട്ട്ബുക്കില്‍ എഴുതാത്തതിന് ചൂരല്‍ കൊണ്ട് ഒട്ടേറെത്തവണ കുട്ടിയുടെ കയ്യില്‍ അടിക്കുകയായിരുന്നുവെന്നാണ് പരാതി. കുട്ടിയെ തറയിലിരുത്തുകയും വീണ്ടും എഴുതാന്‍ ആവശ്യപ്പെടുകയും ചെയ്‌തെന്നും പൊലീസ് പറഞ്ഞു. കുട്ടിയുടെ ഇരുകൈകളിലും കൈത്തണ്ടയിലും ഇടതുകൈപ്പത്തിക്ക് പുറത്തും ഒന്‍പതിടത്തായി അടിയേറ്റ് ചുവന്ന പാടുകളുണ്ട്.
തിങ്കളാഴ്ച ഉച്ചയ്ക്കു ശേഷമാണ് സംഭവം. കുട്ടി വൈകിട്ട് വീട്ടിലെത്തി വിവരം പറഞ്ഞു. തുടര്‍ന്നു കോഴഞ്ചേരി ജില്ലാ ആശുപത്രിയില്‍ ചികിത്സ തേടി. വീട്ടുകാരുടെ പരാതിയില്‍ പൊലീസ് കുട്ടിയുടെ മൊഴി രേഖപ്പെടുത്തിയ ശേഷമാണ് കേസ് റജിസ്റ്റര്‍ ചെയ്തത്. അധ്യാപകന് ഉപാധികളോടെ ജാമ്യം നല്‍കി. ഇന്ന് കോടതിയില്‍ ഹാജരാകണം.
