മലപ്പുറം: പനിക്ക് ചികിത്സ തേടിയെത്തിയ യുവാവിന് സർക്കാർ കുടുംബാരോഗ്യ കേന്ദ്രത്തിൽനിന്ന് വിതരണം ചെയ്തത് കാലാവധി കഴിഞ്ഞ ആന്റിബയോട്ടിക് മരുന്ന്. മേലാറ്റൂർ പൂന്താനം സർക്കാർ കുടുംബാരോഗ്യ കേന്ദ്രത്തിൽ ചികിത്സയ്‌ക്കെത്തിയ കീഴാറ്റൂർ കൊണ്ടിപറമ്പ് സ്വദേശിയായ 39-കാരനാണ് കാലാവധി കഴിഞ്ഞ സിപ്രോഫ്ലോക്സാസിൻ മരുന്ന് നൽകിയത്.
ചൊവ്വാഴ്ച പനിയെ തുടർന്ന് ചികിത്സ തേടിയെത്തിയ യുവാവിന് ഡോക്ടറുടെ നിർദേശപ്രകാരമാണ് മരുന്ന് നൽകിയത്. മരുന്നിന്റെ പാക്കറ്റിൽ രേഖപ്പെടുത്തിയ കാലാവധി പരിശോധിച്ചപ്പോഴാണ് വീഴ്ച ശ്രദ്ധയിൽപ്പെട്ടത്. 2026 ഓഗസ്റ്റ് വരെയായിരുന്നു മരുന്നിന്റെ കാലാവധി. എന്നാൽ ഒക്ടോബറിൽ മരുന്ന് വിതരണം ചെയ്തതോടെ കാലാവധി കഴിഞ്ഞ് രണ്ടുമാസമായിരുന്നു.
സംഭവം പുറത്തറിഞ്ഞതോടെ മരുന്ന് വിതരണത്തിലെ വീഴ്ച ചർച്ചയായി. കാലാവധി കഴിഞ്ഞ മരുന്നുകൾ നേരത്തേ മാറ്റിയിരുന്നുവെന്നും അറിയാതെ വിതരണത്തിനിടെ പഴയ മരുന്ന് ഉൾപ്പെട്ടതാകാമെന്നുമാണ് അധികൃതരുടെ വിശദീകരണം.
യുവാവ് മരുന്ന് കഴിച്ചിട്ടുണ്ടോയെന്നും ആരോഗ്യപ്രശ്നങ്ങളുണ്ടായിട്ടുണ്ടോയെന്നും വ്യക്തമല്ല. സംഭവത്തിൽ തുടർനടപടികൾ സ്വീകരിച്ചിട്ടുണ്ടോയെന്ന വിവരവും ലഭ്യമായിട്ടില്ല.
