സംസ്ഥാനത്ത് ഒറ്റപ്പെട്ടയിടങ്ങളിൽ ഇന്ന് (22/10/2026) മുതൽ ഒക്ടോബർ 26 വരെ ഇടിമിന്നലോടുകൂടിയ ശക്തമായ മഴയ്ക്കും, മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ വീശിയടിക്കുന്ന കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി.
ഇടിമിന്നൽ മനുഷ്യജീവനും മൃഗങ്ങൾക്കും വൈദ്യുത ശൃംഖലകൾക്കും വീട്ടുപകരണങ്ങൾക്കും വലിയ നാശനഷ്ടങ്ങൾ ഉണ്ടാക്കാൻ സാധ്യതയുള്ളതിനാൽ പൊതുജനങ്ങൾ താഴെ പറയുന്ന മുൻകരുതലുകൾ കർശനമായി പാലിക്കേണ്ടതാണ്.
പ്രധാന മുൻകരുതലുകൾ
- തുടക്കം മുതൽ ശ്രദ്ധിക്കുക: കാർമേഘം കണ്ടുതുടങ്ങുന്ന സമയം മുതൽ തന്നെ മുൻകരുതലുകൾ സ്വീകരിക്കുക. ഇടിമിന്നൽ എപ്പോഴും ദൃശ്യമാകണമെന്നില്ല.
- സുരക്ഷിത കെട്ടിടങ്ങളിലേക്ക് മാറുക: ഇടിമിന്നലിന്റെ ആദ്യ ലക്ഷണം കണ്ടുകഴിഞ്ഞാൽ ഉടൻ തന്നെ ഏതെങ്കിലും സുരക്ഷിതമായ കെട്ടിടത്തിനുള്ളിലേക്ക് മാറാൻ ശ്രദ്ധിക്കുക. തുറസായ സ്ഥലങ്ങളിൽ തുടരുന്നത് അപകടകരമാണ്.
- വീടിനുള്ളിലെ ജാഗ്രത: ജനലുകളും വാതിലുകളും അടച്ചുപൂട്ടിയിരിക്കുക. ഭിത്തിയിലോ തറയിലോ പരമാവധി സ്പർശിക്കാതിരിക്കാൻ ശ്രമിക്കുക.
- വൈദ്യുതോപകരണങ്ങൾ: ടി.വി, കമ്പ്യൂട്ടർ തുടങ്ങിയ ഗൃഹോപകരണങ്ങളുടെ വൈദ്യുതി ബന്ധം വിഛേദിക്കുക. ഇടിമിന്നലുള്ള സമയത്ത് ലാൻഡ്‌ലൈൻ ഫോണുകൾ ഉപയോഗിക്കരുത് (മൊബൈൽ ഫോണുകൾ ഉപയോഗിക്കുന്നതിൽ കുഴപ്പമില്ല).
- കുട്ടികളുടെ കാര്യത്തിൽ ശ്രദ്ധ: അന്തരീക്ഷം മേഘാവൃതമാണെങ്കിൽ കുട്ടികളെ ടെറസിലോ തുറസായ സ്ഥലത്തോ കളിക്കാൻ വിടരുത്. മഴക്കാറ് കാണുമ്പോൾ തുണികൾ എടുക്കാനായി പുറത്തേക്ക് പോകരുത്.
- മരങ്ങളുടെ ചുവട്ടിൽ നിൽക്കരുത്: ഇടിമിന്നലുള്ളപ്പോൾ ഒരു കാരണവശാലും മരച്ചുവട്ടിൽ നിൽക്കുകയോ വാഹനങ്ങൾ മരച്ചുവട്ടിൽ പാർക്ക് ചെയ്യുകയോ ചെയ്യരുത്.
- യാത്ര ചെയ്യുമ്പോൾ: കാറുകൾ പോലുള്ള വാഹനങ്ങൾക്കുള്ളിൽ ഇരിക്കുന്നതാണ് സുരക്ഷിതം (കൈകാലുകൾ പുറത്തിടാതിരിക്കുക). എന്നാൽ സൈക്കിൾ, ബൈക്ക്, ട്രാക്ടർ തുടങ്ങിയവയിലെ യാത്ര ഒഴിവാക്കി അടുത്തുള്ള സുരക്ഷിതമായ കെട്ടിടത്തിൽ അഭയം തേടുക.
- ജലാശയങ്ങളുമായി ബന്ധപ്പെട്ടവ: കുളിക്കാനോ മീൻ പിടിക്കാനോ ജലാശയങ്ങളിൽ ഇറങ്ങരുത. ബോട്ടിങ്, ചൂണ്ടയിടൽ, വലയെറിയൽ എന്നിവ ഉടൻ നിർത്തി കരയിലേക്ക് മടങ്ങുക. ഡെക്കിൽ നിൽക്കുന്നതും ഒഴിവാക്കുക.
- വളർത്തുമൃഗങ്ങൾ: മൃഗങ്ങളെ തുറസായ സ്ഥലങ്ങളിൽ കെട്ടരുത്. മഴക്കാറ് കാണുമ്പോൾ അവയെ അഴിക്കാനോ മാറ്റിക്കെട്ടാനോ പുറത്തിറങ്ങുന്നത് നിങ്ങൾക്ക് മിന്നലേറ്റേക്കാൻ കാരണമായേക്കാം.
- തുറസായ സ്ഥലത്താണെങ്കിൽ: മറ്റ് മാർഗ്ഗങ്ങളില്ലെങ്കിൽ, പാദങ്ങൾ ചേർത്തു വെച്ച് തല കാൽമുട്ടുകൾക്കിടയിൽ ഒതുക്കി പന്തുപോലെ ഉരുണ്ടിരിക്കുക.
- മറ്റ് മുൻകരുതലുകൾ: പട്ടം പറത്തുന്നത് ഒഴിവാക്കുക. കാറ്റിൽ മറിഞ്ഞുവീഴാൻ സാധ്യതയുള്ള വസ്തുക്കൾ കെട്ടിയിടുക. കെട്ടിടങ്ങൾക്ക് മുകളിൽ മിന്നൽ രക്ഷാചാലകവും, ഉപകരണങ്ങളുടെ സുരക്ഷയ്ക്കായി ‘സർജ് പ്രൊട്ടക്ടറും’ ഘടിപ്പിക്കുന്നത് നന്നായിരിക്കും.
മിന്നലേറ്റാൽ ചെയ്യേണ്ടത്
മിന്നലേറ്റാൾ പൊള്ളൽ, കാഴ്ച/കേൾവി നഷ്ടപ്പെടൽ, ഹൃദയാഘാതം എന്നിവ സംഭവിക്കാം. മിന്നലേറ്റ ആളുടെ ശരീരത്തിൽ വൈദ്യുത പ്രവാഹം ഉണ്ടാകില്ല എന്ന കാര്യം ഓർക്കുക. അതിനാൽ പ്രഥമ ശുശ്രൂഷ നൽകാൻ മടിക്കരുത്. മിന്നലേറ്റ ശേഷമുള്ള ആദ്യ 30 സെക്കൻഡുകൾ ജീവൻ രക്ഷിക്കാൻ അതിപ്രധാനമാണ്. ഉടൻ തന്നെ വൈദ്യസഹായം എത്തിക്കുക.
