തിരുവനന്തപുരം: സംസ്ഥാനത്ത് വൈദ്യുതി നിരക്ക് വർധനയ്ക്ക് വഴിയൊരുക്കി പുതിയ താരിഫ് നയം. 2027 ഏപ്രിൽ മുതൽ നിരക്ക് വർധന നടപ്പാക്കാനാണ് തീരുമാനം. അടുത്ത വർഷം മുതൽ പുതിയ സർചാർജും നിലവിൽ വരും.
കെ.എസ്.ഇ.ബിയുടെ മുൻകാല നഷ്ടം അയ്യായിരം കോടി രൂപയോളം വരുമെന്നാണ് കണക്കാക്കുന്നത്. ഈ സാമ്പത്തിക ബാധ്യതയും ഹ്രസ്വകാല വൈദ്യുതി കരാറുകളിലെ അധിക ചെലവും ഉപഭോക്താക്കളെ ബാധിക്കുന്ന രീതിയിലാണ് പുതിയ നയത്തിന്റെ ഘടന. ഇന്ധന സർചാർജും വൈദ്യുതി നിരക്കിൽ ഉൾപ്പെടുത്തും.
അതേസമയം, വൈദ്യുതി ഉപയോഗത്തിലെ പീക്ക് സമയത്തിലും മാറ്റം വരുത്തിയിട്ടുണ്ട്. നിലവിൽ വൈകിട്ട് ആറു മുതൽ രാത്രി പത്തുവരെയായിരുന്ന പീക്ക് സമയം ഇനി രാത്രി 11.30 വരെ നീളും. പുതിയ സമയക്രമം അനുസരിച്ച് വൈകിട്ട് ആറു മുതൽ രാത്രി 11.30 വരെയായിരിക്കും പീക്ക് സമയം.
ഈ സമയത്തെ ഉയർന്ന വൈദ്യുതി ഉപഭോഗത്തിന് ബാധകമായ നിരക്കിലും മാറ്റമുണ്ടായേക്കും.
