എടക്കര: നീലഗിരിയിലേക്കുള്ള യാത്രക്കാര്‍ നിരോധിക്കപ്പെട്ട പ്ലാസ്റ്റിക് ഉല്‍പന്നങ്ങള്‍ കൈവശം വയ്ക്കുന്നതായി കണ്ടാല്‍ വാഹന ഉടമയില്‍ നിന്ന് 10,000 രൂപ പിഴ ഈടാക്കുന്ന നടപടിയുമായി അധികൃതര്‍. തുടര്‍ച്ചയായി നിയമലംഘനം നടത്തുന്ന വാഹനങ്ങള്‍ കണ്ടെത്തിയാണു പിഴ ഈടാക്കാന്‍ നീക്കം. തുടര്‍ന്നും ഇത് ആവര്‍ത്തിച്ചാല്‍ പെര്‍മിറ്റ് റദ്ദാക്കുമെന്നുമാണ് നീലഗിരി ജില്ലാ കലക്ടര്‍ അറിയിച്ചിരിക്കുന്നത്.
നീലഗിരിയിലേക്കുള്ള യാത്രക്കാരില്‍ നിരോധിക്കപ്പെട്ട പ്ലാസ്റ്റിക് ഉല്‍പന്നം ഒരാളെങ്കിലും കൈവശംവച്ചെന്ന് കണ്ടെത്തിയാല്‍ അയാള്‍ യാത്ര ചെയ്ത വാഹനം കണ്ടുകെട്ടുകയും പെര്‍മിറ്റ് റദ്ദാക്കുകയും ചെയ്യണമെന്ന മദ്രാസ് ഹൈക്കോടതി ഉത്തരവിനെ തുടര്‍ന്നാണു നടപടി. വെള്ളക്കുപ്പികള്‍ ഉള്‍പ്പെടെ ഒറ്റത്തവണ ഉപയോഗിക്കുന്ന പ്ലാസ്റ്റിക് ഉല്‍പന്നങ്ങള്‍ക്ക് ഹൈക്കോടതി നിര്‍ദേശത്തെത്തുടര്‍ന്ന് നീലഗിരിയിലെ വിനോദസഞ്ചാരകേന്ദ്രങ്ങളില്‍ നിരോധനം ഏര്‍പ്പെടുത്തിയിട്ടുണ്ട്.
ഈ നിരോധനം ഫലപ്രദമായി നടപ്പാകുന്നുണ്ടോ എന്നു പരിഗണിക്കവേയാണ് ഹൈക്കോടതി നീലഗിരി കലക്ടര്‍ക്ക് കര്‍ശന നിര്‍ദേശം നല്‍കിയത്. കുടിവെള്ള എടിഎമ്മുകളില്‍ നാണയത്തിനു പകരം സാമൂഹികവിരുദ്ധര്‍ ബബിള്‍ഗമ്മും കല്ലും ഇടുന്ന പ്രശ്‌നത്തിനു പരിഹാരത്തിനായി യുപിഐ സ്‌കാനുള്ള വാട്ടര്‍ എടിഎമ്മുകളും ആര്‍ഒ ഫില്‍റ്ററുകളും സ്ഥാപിക്കുന്ന കാര്യം പരിഗണനയിലാണെന്നും കലക്ടര്‍ വ്യക്തമാക്കിയിട്ടുണ്ട്.
