കോട്ടയം: ചന്തക്കവലയിൽ നിയന്ത്രണം വിട്ട സ്വകാര്യബസ് യാത്രക്കാർക്കിടയിലേക്ക് ഇടിച്ചുകയറിയുണ്ടായ അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന പെൺകുട്ടി മരിച്ചു. നട്ടാശേരി ഗാന്ധിസ്മാരക കേന്ദ്രത്തിന് സമീപം ഇഞ്ചേരിക്കുന്ന് പാറയിൽ അജയന്റെ മകൾ അഞ്ജലി (18) ആണ് മരിച്ചത്. കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് അന്ത്യം.
വെള്ളിയാഴ്ച വൈകിട്ട് ഏഴോടെയാണ് കോട്ടയം ചന്തക്കവലയിൽ അപകടമുണ്ടായത്. കോട്ടയത്തുനിന്ന് ചങ്ങനാശേരിയിലേക്ക് സർവീസ് നടത്തുന്ന ‘തണ്ടപ്ര’ എന്ന സ്വകാര്യബസാണ് അപകടത്തിൽപ്പെട്ടത്. നാഗമ്പടം ഭാഗത്തുനിന്ന് ചന്തക്കവലയിലേക്ക് വരികയായിരുന്ന ബസിന്റെ നിയന്ത്രണം നഷ്ടപ്പെട്ടതോടെ റോഡരികിലേക്ക് ഇടിച്ചുകയറുകയായിരുന്നു. ഫുട്പാത്തിലെ ഗ്രില്ലുകളും വൈദ്യുതി പോസ്റ്റും തകർത്ത ബസ് യാത്രക്കാർക്കിടയിലേക്ക് പാഞ്ഞുകയറി. അപകടത്തിൽ അഞ്ജലി ഉൾപ്പെടെ അഞ്ച് സ്ത്രീകൾക്കാണ് പരിക്കേറ്റത്. ഇത്തിത്താനം സുഭാഷ് ഭവനിൽ ശ്രീകുമാരി (54), മറിയപ്പള്ളി മുട്ടം ഉള്ളാട്ട് വീട്ടിൽ ജയ (51), കൊല്ലാട് കലേഷ് ഭവനിൽ അനുമോൾ സുരേഷ് (48), ചങ്ങനാശേരി മലകുന്നം ആനക്കുഴി വീട്ടിൽ എ.കെ. സുനി (46) എന്നിവരാണ് പരിക്കേറ്റ മറ്റുള്ളവർ.
ഓടിക്കൂടിയ നാട്ടുകാരാണ് പരിക്കേറ്റവരെ ജില്ലാ ജനറൽ ആശുപത്രിയിലെത്തിച്ചത്. ഗുരുതരമായി പരിക്കേറ്റ മൂന്നുപേരെ പിന്നീട് കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി. അപകടവുമായി ബന്ധപ്പെട്ട് ബസ് ഡ്രൈവർ കുറിച്ചി സ്വദേശി അതുൽ ബിജുവിനെയും കണ്ടക്ടർ മലകുന്നം സ്വദേശി ഷാലുവിനെയും വെസ്റ്റ് പൊലീസ് കസ്റ്റഡിയിലെടുത്തു. വെസ്റ്റ് എസ്.ഐ. വി.എസ്. ഗിരീഷിന്റെ നേതൃത്വത്തിലായിരുന്നു നടപടി.
അപകടത്തിന്റെ സാഹചര്യങ്ങളെക്കുറിച്ച് പൊലീസ് തുടർനടപടികൾ സ്വീകരിച്ചുവരികയാണ്.
