പുതിയ സർക്കാരിന്റെ സത്യപ്രതിജ്ഞാ ചടങ്ങിനായി തിരുവനന്തപുരം സെൻട്രൽ സ്റ്റേഡിയത്തിൽ ഒരുക്കങ്ങൾ അവസാനഘട്ടത്തിൽ. സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളും പൂർത്തിയായതായി പോലീസ് അധികൃതർ അറിയിച്ചു. ഘടകകക്ഷികളുമായുള്ള മന്ത്രിസ്ഥാന ചർച്ചകൾ തുടരുന്നതിനിടയിലും, ചടങ്ങ് വൻ ജനപങ്കാളിത്തത്തോടെ ഗംഭീരമാക്കാനുള്ള ഒരുക്കത്തിലാണ് മുന്നണി നേതൃത്വം.
അൻപതിനായിരം പേർക്ക് സൗകര്യം; പന്തൽ വിസ്തൃതി കൂട്ടി: സെൻട്രൽ സ്റ്റേഡിയത്തിലെ പന്തൽ നിർമ്മാണവും സ്റ്റേജ് ഒരുക്കങ്ങളും നിലവിൽ അവസാനഘട്ടത്തിലാണ്. തുടക്കത്തിൽ 12,000 പേർക്ക് പ്രവേശനം നൽകാനാണ് തീരുമാനിച്ചിരുന്നതെങ്കിലും പ്രവർത്തകരുടെയും പൊതുജനങ്ങളുടെയും തിരക്ക് വർദ്ധിക്കാനുള്ള സാധ്യത കണക്കിലെടുത്ത് പന്തലിന്റെ വിസ്തൃതി വർദ്ധിപ്പിച്ചു. 50,000 പേരെ ഉൾക്കൊള്ളാവുന്ന തരത്തിലുള്ള വമ്പൻ പന്തലാണ് ഇത്തവണ സ്റ്റേഡിയത്തിൽ സജ്ജീകരിക്കുന്നത്.
നഗരത്തിൽ എൽഇഡി സ്ക്രീനുകൾ: പാസ് ലഭിക്കാത്ത പാർട്ടി പ്രവർത്തകർക്കും പൊതുജനങ്ങൾക്കും സത്യപ്രതിജ്ഞാ ചടങ്ങ് തത്സമയം കാണുന്നതിനായി തിരുവനന്തപുരം നഗരത്തിന്റെ വിവിധ ഭാഗങ്ങളിൽ എൽഇഡി സ്ക്രീനുകൾ സ്ഥാപിക്കുമെന്ന് കെപിസിസി അറിയിച്ചിട്ടുണ്ട്.
സുരക്ഷാ ക്രമീകരണങ്ങൾ പൂർത്തിയായി: സത്യപ്രതിജ്ഞാ ചടങ്ങിനുള്ള സുരക്ഷാ മുന്നൊരുക്കങ്ങൾ പൂർത്തിയാക്കിയതായി ഡിജിപി ചന്ദ്രശേഖർ അറിയിച്ചു. സുരക്ഷാ ക്രമീകരണങ്ങളെല്ലാം സജ്ജമായതായി തിരുവനന്തപുരം സിറ്റി പോലീസ് കമ്മീഷണർ കെ. കാർത്തിക് മാധ്യമങ്ങളോട് വ്യക്തമാക്കി. നഗരത്തിൽ ഗതാഗതക്കുരുക്ക് ഒഴിവാക്കുന്നതിനുള്ള പ്രത്യേക ക്രമീകരണങ്ങൾ ചെയ്തിട്ടുണ്ട്. വിവിഐപികളുടെയും മന്ത്രിമാരുടെയും വാഹനങ്ങൾ കടന്നുപോകേണ്ട വഴികളും പാർക്കിംഗ് സൗകര്യങ്ങളും മുൻകൂട്ടി നിശ്ചയിച്ചിട്ടുണ്ട്.
തീരദേശത്തും ജാഗ്രത; വിവിഐപി സാന്നിധ്യം: സുരക്ഷ വിലയിരുത്തുന്നതിന്റെ ഭാഗമായി എല്ലാ വിഭാഗങ്ങൾക്കും ജാഗ്രതാ നിർദ്ദേശം നൽകിയിട്ടുണ്ട്. നഗരത്തിന് പുറമെ തീരദേശ മേഖലകളിലും ശക്തമായ പോലീസ് വിന്യാസമുണ്ടാകും. അതേസമയം, ചടങ്ങിൽ തമിഴ്നാട് മുഖ്യമന്ത്രി പങ്കെടുക്കുമോ എന്ന കാര്യത്തിൽ ഔദ്യോഗികമായ സ്ഥിരീകരണം ഇതുവരെ ലഭ്യമായിട്ടില്ല.
