കൊല്ലം: കുന്നിക്കോട് കോക്കാട് ശിവക്ഷേത്രത്തിലെ ഉത്സവത്തിനിടെ യുവാവിനെ വെട്ടിക്കൊന്നു. കോക്കാട് മനുവിലാസത്തിൽ മനോജ് (39) ആണ് കൊല്ലപ്പെട്ടത്. ഉത്സവ സ്ഥലത്ത് ഇന്നലെ രാത്രിയുണ്ടായ സംഘർഷത്തിനിടെയാണ് മനോജിന് വെട്ടേറ്റത്.
കോക്കാട് റോഡിൽ വെട്ടേറ്റ നിലയിൽ കണ്ടെത്തിയ മനോജിനെ നാട്ടുകാരും പൊലീസും ചേർന്ന് ആശുപത്രിയിൽ എത്തിച്ചെങ്കിലും മരിക്കുകയായിരുന്നു. കഴുത്തിന് വെട്ടേറ്റ മനോജിന്റെ കൈവിരലുകളും അറുത്തു മാറ്റിയിരുന്നു.
യൂത്ത് ഫ്രണ്ട് (ബി) ചക്കുവരയ്ക്കൽ മണ്ഡലം പ്രസിഡന്റാണ് കൊല്ലപ്പെട്ട മനോജ്. രാഷ്ട്രീയ കൊലപാതകമാണെന്ന് കേരള കോൺഗ്രസ് (ബി) ആരോപിച്ചു. മനോജിനെ കൊന്നത് കോൺഗ്രസുകാരാണെന്ന് കെ ബി ഗണേഷ് കുമാർ എംഎൽഎ ആരോപിച്ചു.
എന്നാൽ ആരോപണം കോൺഗ്രസ് നിഷേധിച്ചു. സംഭവവുമായി കോൺഗ്രസിന് ബന്ധമില്ലെന്നും മരിച്ചയാളുടെ ക്രിമിനൽ പശ്ചാത്തലം അന്വേഷിക്കണമെന്നും കെപിസിസി നിർവാഹക സമിതി അംഗം ജ്യോതികുമാർ ചാമക്കാല ആവശ്യപ്പെട്ടു. കൃത്യമായ അന്വേഷണം നടത്തി പ്രതികളെ ഉടൻ അറസ്റ്റ് ചെയ്യണമെന്നും കോൺഗ്രസ് ആവശ്യപ്പെട്ടു.
