നടന് നിവിന് പോളിയെ പീഢന കേസിലെ പ്രതിപട്ടികയില് നിന്നും ഒഴിവാക്കി. നിവിനെതിരെ കോതമംഗലം സ്വദേശിനിയുടെ പരാതിയിലാണ് കേസെടുത്തിരുന്നത്. പരാതിയില് പറയുന്ന ദിവസം നിവിന് വിദേശത്ത് പോയിട്ടില്ലെന്ന് അന്വേഷണത്തില് കണ്ടെത്തി. എഫ്ഐആറില് ആറാംപ്രതിയായിരുന്നു നിവിന് പോളി. കോതമംഗലം മജിസ്ട്രേറ്റ് കോടതിയില് പൊലീസ് റിപ്പോര്ട്ട് സമര്പ്പിച്ചു.
തനിക്കെതിരായ പരാതി വ്യാജമെന്ന് നിവിന് മൊഴി നല്കിയിരുന്നു. പീഡനം നടന്നുവെന്ന് പറയുന്ന സമയത്ത് കേരളത്തിലെ ഷൂട്ടിങ് ലൊക്കേഷനിലാണുണ്ടായിരുന്നത്. ഇക്കാര്യം പാസ്പോര്ട്ട് പരിശോധിച്ചാല് ബോധ്യപ്പെടുമെന്നുന്നും നിവിന് അന്വേഷണസംഘത്തെ അറിയിച്ചിരുന്നു.
കൂട്ടബലാത്സംഗം ചെയ്തുവെന്ന കോതമംഗലം സ്വദേശിനിയായ യുവതി പരാതി നല്കിയിരുന്നു. യുവതിയുടെയും ആരോപണം ഹേമ കമ്മിറ്റി റിപ്പോര്ട്ട് പുറത്തു വന്നതിനു പിന്നാലെയുണ്ടായ വെളിപ്പെടുത്തലിന്റെ ഭാഗമായായിരുന്നു. ദുബായില് വച്ചാണ് സംഭവം നടന്നതെന്നാണ് യുവതി പൊലീസിനു നല്കിയ മൊഴി. പീഡന ദൃശ്യങ്ങള് മൊബൈല് ഫോണില് പകര്ത്തിയെന്നും അതു പുറത്തുവിടുമെന്ന് ഭീഷണിപ്പെടുത്തിയതായും യുവതി പറഞ്ഞിരുന്നു. ഇതിന്റെ അടിസ്ഥാനത്തില് കൂട്ടബലാത്സംഗം, സ്ത്രീത്വത്തെ അപമാനിക്കല് തുടങ്ങിയ വകുപ്പുകളാണു ചുമത്തിയിരുന്നത്. യുവതി പറയുന്ന ദിവസങ്ങളില് നിവിന് ‘വര്ഷങ്ങള്ക്കു ശേഷം’ സിനിമയുടെ ഷൂട്ടിങ്ങിനായി കൊച്ചിയില് ഉണ്ടായിരുന്നുവെന്നാണ് സംവിധായകന് വിനീത് ശ്രീനിവാസന് പറഞ്ഞത്. യുവതി പരാതിയുമായി വന്നതിന് പിന്നാലെ നിവിന് രംഗത്തെത്തുകയും വാര്ത്താസമ്മേളനത്തില് കാര്യങ്ങള് വ്യക്തമാക്കുകയും ആരോപണങ്ങള് തള്ളുകയും ചെയ്തിരുന്നു.
