കോഴിക്കോട്: കോഴിക്കോട് മുക്കത്ത് ജനവാസമേഖലയിൽ ഭീതി പരത്തി ഭീമൻ പെരുമ്പാമ്പ്. മുക്കം മാമ്പൊയിൽ സ്വദേശി സന്തോഷിന്റെ വീടിന് സമീപത്തെ പറമ്പിൽ നിന്നാണ് ഏകദേശം 50 കിലോയോളം തൂക്കം വരുന്ന കൂറ്റൻ പെരുമ്പാമ്പിനെ പിടികൂടിയത്. വലിയ ഇരയെ വിഴുങ്ങി അനങ്ങാൻ കഴിയാത്ത നിലയിലായിരുന്നു പാമ്പ് പറമ്പിൽ കിടന്നിരുന്നത്.
ശനിയാഴ്ച പറമ്പിൽ പാമ്പിനെ കണ്ട വീട്ടുകാർ ഉടൻ തന്നെ വിവരം വനംവകുപ്പിനെയും സ്നേക്ക് റെസ്ക്യൂ വളണ്ടിയറെയും അറിയിക്കുകയായിരുന്നു. വിവരമറിഞ്ഞ് സ്നേക്ക് റെസ്ക്യൂ വളണ്ടിയറായ ബാബു വെള്ളങ്ങൻ സ്ഥലത്തെത്തി.
വലിയ ശരീരവലിപ്പമുള്ള പാമ്പായതിനാൽ അതിനെ സുരക്ഷിതമായി ചാക്കിലാക്കുക എന്നത് ഏറെ പ്രയത്നമേറിയതായിരുന്നു. റെസ്ക്യൂവർ ബാബു വെള്ളങ്ങനും നാട്ടുകാരും ചേർന്ന് ഏറെ നേരത്തെ ശ്രമത്തിനൊടുവിലാണ് പെരുമ്പാമ്പിനെ പരിക്കുകളൊന്നുമില്ലാതെ സുരക്ഷിതമായി പിടികൂടിയത്. പിടികൂടിയ പെരുമ്പാമ്പിനെ വനംവകുപ്പ് അധികൃതർക്ക് കൈമാറിയിട്ടുണ്ട്. വനപാലകർ ഇതിന്റെ ആരോഗ്യനില പരിശോധിച്ച ശേഷം ജനവാസമില്ലാത്ത ഉൾക്കാട്ടിലേക്ക് തുറന്നുവിടുമെന്ന് സ്നേക്ക് റെസ്ക്യൂവർ അറിയിച്ചു.
