പാകിസ്താന് വിസ നിഷേധിച്ചെന്ന വാര്‍ത്തകളോട് പ്രതികരിച്ച് ഹജ്ജ് ചെയ്യാന്‍ മക്കയിലേക്കുള്ള കാല്‍നട യാത്ര നടത്തുന്ന ഷിഹാബ് ചോറ്റൂര്‍. തന്റെ യൂട്യൂബ്, ഫേസ്ബുക്ക് പേജുകളിലൂടെയാണ് നിലവിലെ സാഹചര്യം വ്യക്തമാക്കി ഷിഹാബ് രംഗത്തെത്തിയത്. പാകിസ്താന് വിസ നല്‍കാന്‍ തയാറാണെന്നും ക്യാറ്റഗറിയില്‍ വന്നൊരു പ്രശ്‌നമാണ് ഉണ്ടായതെന്നും ഷിഹാബ് പറഞ്ഞു.
ടൂറിസ്റ്റ് വിസ നല്‍കാന്‍ പാക് അധികൃതര്‍ തയാറാണ്. എന്നാല്‍ അവിടെ കറങ്ങി തിരിച്ചുവരാനുള്ളവര്‍ക്കാണ് അത് ആവശ്യം. തനിക്ക് പാകിസ്താനിലൂടെ അടുത്ത ലക്ഷ്യസ്ഥാനമായ ഇറാനിലേക്ക് സഞ്ചരിക്കാന്‍ വേണ്ടത് ടൂറിസ്റ്റ് വിസയല്ല, ട്രാന്‍സിറ്റ് വിസയാണെന്നും അതിനായി കാത്തിരിക്കുകയാണെന്നും ഷിഹാബ് വ്യക്തമാക്കി.
