കൊച്ചി: മൂവാറ്റുപുഴയിൽ അടയ്ക്ക മോഷണക്കേസിൽ പ്രതി അറസ്റ്റിൽ. കാലാമ്പൂർ ഇഞ്ചക്രാന്തി ഭാഗത്ത് താമസിക്കുന്ന തൊടുപുഴ കുമ്പംകല്ല് തൊട്ടിപ്പറമ്പിൽ വീട്ടിൽ അമീൻ (42) ആണ് മൂവാറ്റുപുഴ പൊലീസ് പിടിയിലായത്.
മൂവാറ്റുപുഴ-കടാതി അമ്പലംപടി ഭാഗത്തെ മലഞ്ചരക്ക് കടയുടെ തിണ്ണയിൽ നിന്ന് 37 കിലോ ഉണങ്ങിയ അടയ്ക്ക മോഷ്ടിച്ചെന്നാണ് കേസ്. ഈ മാസം 25ന് പകലായിരുന്നു സംഭവം. മോഷ്ടിച്ച അടയ്ക്ക പ്രതിയിൽ നിന്ന് പൊലീസ് കണ്ടെടുത്തു.
മോഷണം തടയുന്നതിനായി മൂവാറ്റുപുഴ ഡിവൈ.എസ്.പി കെ.ആർ. മനോജിന്റെ നിർദേശപ്രകാരം സി.ഐ എം.എസ്. ഫൈസലിന്റെ നേതൃത്വത്തിലുള്ള അന്വേഷണ സംഘമാണ് പ്രതിയെ അറസ്റ്റ് ചെയ്തത്.
നിരവധി മോഷണക്കേസുകളിൽ ഉൾപ്പെട്ടിട്ടുള്ള പ്രതിക്ക് സമാന സ്വഭാവമുള്ള മറ്റ് കേസുകളുമായി ബന്ധമുണ്ടോയെന്നും പൊലീസ് അന്വേഷിക്കുന്നുണ്ട്.
അന്വേഷണ സംഘത്തിൽ എസ്.ഐമാരായ ആർ.ബി. റോഷ്നി, ടി.എ. മുഹമ്മദ്, എ.എസ്.ഐമാരായ കെ.എ. അനസ്, കെ.എം. അനീഷ് എന്നിവരും ഉണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
