കോഴിക്കോട്: താമരശ്ശേരിയിൽ ഓണാഘോഷ പരിപാടിക്കിടെ പ്ലസ് വൺ വിദ്യാർത്ഥികൾക്ക് സീനിയർ വിദ്യാർത്ഥികളുടെ മർദനം. പരിക്കേറ്റ മൂന്ന് വിദ്യാർത്ഥികൾ ചികിത്സ തേടി.
താമരശ്ശേരി ഗവൺമെന്റ് ഹയർ സെക്കൻഡറി സ്കൂളിൽ കഴിഞ്ഞ ദിവസം ഉച്ചയ്ക്ക് ഒരു മണിയോടെയാണ് സംഭവം. സ്കൂളിലെ ഓണാഘോഷ പരിപാടികൾക്കിടെയായിരുന്നു സംഘർഷം.
ഒരേ ഡ്രസ് കോഡിൽ ഫോട്ടോയ്ക്ക് പോസ് ചെയ്യുന്നത് സീനിയർ വിദ്യാർത്ഥികൾ തടഞ്ഞതിനെ തുടർന്നാണ് തർക്കമുണ്ടായതെന്ന് പ്ലസ് വൺ വിദ്യാർത്ഥികൾ പറയുന്നു. പിന്നീട് തർക്കം അക്രമത്തിൽ കലാശിക്കുകയായിരുന്നു.
മൂന്ന് വിദ്യാർത്ഥികൾക്കും മുഖത്ത് പരിക്കേറ്റു. സീനിയർ വിദ്യാർത്ഥികൾ ആയുധം ഉപയോഗിച്ചാണ് മർദിച്ചതെന്നും പ്ലസ് വൺ വിദ്യാർത്ഥികൾ ആരോപിച്ചു.
സംഭവത്തിൽ താമരശ്ശേരി പൊലീസ് വിദ്യാർത്ഥികളുടെ മൊഴി രേഖപ്പെടുത്തി. സംഭവത്തിൽ തുടർ അന്വേഷണം നടത്തിവരികയാണ്.
ഒരു വർഷം മുമ്പ് താമരശ്ശേരിയിൽ സഹപാഠികളുടെ മർദനമേറ്റ് പത്താം ക്ലാസ് വിദ്യാർത്ഥി ഷഹബാസ് മരിച്ച സംഭവം വലിയ പ്രതിഷേധത്തിനും ആശങ്കയ്ക്കും ഇടയാക്കിയിരുന്നു.
