കേരളത്തിൽ യു.ഡി.എഫ് അധികാരത്തിൽ തിരിച്ചെത്തുമെന്ന് എ.ഐ.സി.സി അധ്യക്ഷൻ മല്ലികാർജുൻ ഖാർഗെ. തമിഴ്നാട്ടിലും പുതുച്ചേരിയിലും കോൺഗ്രസ് സഖ്യം മികച്ച വിജയം നേടുമെന്നും ആസാമിലെ എക്സിറ്റ് പോൾ ഫലങ്ങളെ തള്ളിക്കളയുന്നുവെന്നും അദ്ദേഹം വ്യക്തമാക്കി. കർണാടകയിലെ നേതൃമാറ്റ ചർച്ചകളെക്കുറിച്ചുള്ള ചോദ്യങ്ങൾക്കും അദ്ദേഹം മറുപടി നൽകി.
നിയമസഭാ തിരഞ്ഞെടുപ്പ് ഫലങ്ങൾ പുറത്തുവരാനിരിക്കെ തികഞ്ഞ ആത്മവിശ്വാസത്തിലാണ് കോൺഗ്രസ് ക്യാമ്പ്. കേരളത്തിൽ യു.ഡി.എഫ് വൻ ഭൂരിപക്ഷത്തോടെ അധികാരത്തിൽ തിരിച്ചെത്തുമെന്ന് മല്ലികാർജുൻ ഖാർഗെ പറഞ്ഞു. ഭരണവിരുദ്ധ വികാരവും യു.ഡി.എഫിന്റെ ഐക്യവും വിജയത്തിന് വഴിയൊരുക്കുമെന്നാണ് എ.ഐ.സി.സിയുടെ വിലയിരുത്തൽ. തമിഴ്നാട്ടിൽ ഭരണത്തുടർച്ച ഉണ്ടാകുമെന്നും പുതുച്ചേരിയിൽ കോൺഗ്രസ് സഖ്യം കരുത്ത് തെളിയിക്കുമെന്നും അദ്ദേഹം കൂട്ടിച്ചേർത്തു.
ആസാമിലെ എക്സിറ്റ് പോൾ ഫലങ്ങളെ പൂർണ്ണമായും തള്ളിക്കളഞ്ഞ ഖാർഗെ, അവിടെ കോൺഗ്രസ് സഖ്യം അപ്രതീക്ഷിത വിജയം നേടുമെന്ന് പ്രത്യാശ പ്രകടിപ്പിച്ചു. താഴെത്തട്ടിലെ പ്രവർത്തനം കോൺഗ്രസിന് അനുകൂലമാണെന്നും അദ്ദേഹം ഓർമ്മിപ്പിച്ചു.
അതേസമയം, കർണാടകയിലെ അധികാര കൈമാറ്റം സംബന്ധിച്ച വിവാദങ്ങൾക്കും അദ്ദേഹം മറുപടി നൽകി. നിലവിൽ അത്തരം ചർച്ചകൾ പാർട്ടിയിൽ ഇല്ലെന്ന് ഖാർഗെ വ്യക്തമാക്കി. കർണാടകയിൽ നിലവിൽ ഒരു മുഖ്യമന്ത്രിയുണ്ട്. നേതൃമാറ്റം സംബന്ധിച്ച സാഹചര്യം വന്നാൽ അപ്പോൾ ആലോചിക്കും. രാഹുൽ ഗാന്ധിയും താനും വിഷയം ചർച്ച ചെയ്യുമെന്നും ഇക്കാര്യത്തിൽ സോണിയ ഗാന്ധിയുടേതാകും അന്തിമ തീരുമാനമെന്നും അദ്ദേഹം പറഞ്ഞു.
