കെഎസ്ആര്‍ടിസി ബസില്‍ 17 വയസുകാരന് നേരെ ലൈംഗികാതിക്രമം നടത്തിയ മധ്യവയസ്‌കന്‍ പിടിയില്‍. പത്തനംതിട്ട മൈലപ്ര സ്വദേശി പി കെ ഷിജു (42) ആണ് പിടിയിലായത്. ചൊവ്വാഴ്ച വൈകിട്ടോടെയായിരുന്നു സംഭവം.
തിരുവനന്തപുരത്തു നിന്നും കോട്ടയത്തേക്ക് പോവുകയായിരുന്ന സൂപ്പര്‍ഫാസ്റ്റ് ബസ്സിലാണ് അതിക്രമം നടന്നത്. ബസ് അടൂര്‍ പിന്നിട്ടപ്പോഴാണ് വിദ്യാര്‍ഥിയെ ഷിജു ഉപദ്രവിച്ചത്. ആയൂരില്‍ നിന്ന് ബസില്‍ കയറി കോട്ടയത്തേക്ക് പോവുകയായിരുന്നു ഹയര്‍ സെക്കന്‍ഡറി വിദ്യാര്‍ഥി. അടൂരില്‍ നിന്നും ബസ്സില്‍ കയറിയ ഇയാള്‍ കുട്ടിക്കൊപ്പം ഒരേ സീറ്റിലാണ് ഇരുന്നത്.
ബസ് പുറപ്പെട്ട് കുറച്ചു കഴിഞ്ഞപ്പോള്‍ ഷിജു വിദ്യാര്‍ഥിക്ക് നേരെ ലൈംഗികാതിക്രമം നടത്തുകയായിരുന്നു. ചെങ്ങന്നൂരിന് സമീപം വെച്ച് വിദ്യാര്‍ഥി ബഹളംവച്ചു. ഇതോടെ ബസില്‍ നിന്ന് ഓടി രക്ഷപെടാന്‍ ശ്രമിച്ച ഷിജുവിനെ ബസ് ജീവനക്കാരും മറ്റ് യാത്രക്കാരും ചേര്‍ന്ന് തടഞ്ഞുവെച്ച് തിരുവല്ല പൊലീസിന് കൈമാറുകയായിരുന്നു.
