ജിദ്ദയില്‍ നിന്ന് നാട്ടിലേക്കുള്ള ടിക്കറ്റും 80,000 രൂപ മുതല്‍ ഒന്നേകാല്‍ ലക്ഷം വരെ പണവും പ്രതിഫലമായി കൈപ്പറ്റി സ്വര്‍ണം കടത്തിയ മൂന്നുപേര്‍ കരിപ്പൂരില്‍ പിടിയില്‍.മൂന്ന് കേസുകളിലായി 1.8 കോടി രൂപയുടെ മുന്ന് കിലോയോളം സ്വര്‍ണം എയര്‍ കസ്റ്റംസ് ഇന്റലിജന്‍സ് പിടികൂടി. മലപ്പുറം പുല്‍പ്പറ്റ സ്വദേശി പൂതനാരി ഫവാസില്‍(30) നിന്ന് 1163 ഗ്രാം നെടിയിരിപ്പ് സ്വദേശി തേട്ടത്തൊടി മുഹമ്മദ് ജാസിമില്‍(28) നിന്ന് 1057 ഗ്രാം തൃപ്പനച്ചി സ്വദേശി പാരാ സലീമില്‍ (34)നിന്ന് 1121 ഗ്രാം സ്വര്‍ണ മിശ്രിതമാണ് പിടികൂടിയത്.മൂന്നുപേരും ജിദ്ദയില്‍ നിന്നുള്ള എയര്‍ ഇന്ത്യ എക്‌സ്പ്രസ് ഇന്‍ഡിഗോ വിമാനത്തിലാണ് കരിപ്പൂരില്‍ എത്തിയത്.
കള്ളക്കടത്ത് സംഘം സലീമിനും ഫവാസിനും ടിക്കറ്റിനു പുറമേ 80,000 രൂപ വീതവും ജാസിമിന് 1.2 ലക്ഷം രൂപയുമാണ് പ്രതിഫലം വാഗ്ദാനം ചെയ്തിരുന്നത്. അസി.കമ്മീഷണര്‍ കെ എം സൈഫുദ്ദീന്‍, സൂപ്രണ്ട് മാരായ ബഷീര്‍ അഹമ്മദ് ,ബാബു നാരായണന്‍, എം. മനോജ്, പി .മുരളി .ഇന്‍സ്‌പെക്ടര്‍മാരായ അര്‍ജുന്‍ കൃഷ്ണ ,ദിനേശ് മിര്‍ധ, വീരേന്ദ്ര പ്രതാപ് ചൗധരി, ഹെഡ് ഹവില്‍ദാര്‍മാരായ ടി.എ അലക്‌സ്, പി. വിമല എന്നിവരടങ്ങിയ സംഘമാണ് കള്ളക്കടത്ത് പിടികൂടിയത്
കഴിഞ്ഞ ദിവസവും കോഴിക്കോട് വിമാനത്താവളത്തില്‍ 65 ലക്ഷം രൂപയുടെ കള്ളക്കടത്ത് സ്വര്‍ണവുമായി യുവാവിനെ പിടികൂടിയിരുന്നു. മലപ്പുറം മൂന്നിയൂര്‍ സ്വദേശി പതിയില്‍ വിജേഷിനെയാണ് (33) എയര്‍ കസ്റ്റംസ് ഇന്റലിജന്‍സ് പിടികൂടിയത്. ശരീരത്തിനുള്ളില്‍ ഒളിപ്പിച്ചു കടത്താന്‍ ശ്രമിച്ച 1165 ഗ്രാം സ്വര്‍ണ മിശ്രിതം കണ്ടെടുത്തു.
ഇയാള്‍ ജിദ്ദയില്‍നിന്നുള്ള ഇന്‍ഡിഗോ വിമാനത്തിലാണ് കരിപ്പൂരിലെത്തിയത്. സ്വര്‍ണം കടത്തുന്നതിന് ഒരുലക്ഷം രൂപയാണ് കള്ളക്കടത്ത് സംഘം വാഗ്ദാനം ചെയ്തിരുന്നതെന്നാണ് വിജീഷ് കസ്റ്റംസിന് നല്‍കിയ മൊഴി. ശരീരത്തിനുള്ളില്‍ നാലു ക്യാപ്സൂളികളായി ഒളിപ്പിച്ചിരുന്ന സ്വര്‍ണ്ണമിശ്രിതമാണ് പിടിച്ചെടുത്തത്.
