സംസ്ഥാനത്ത് ഇന്ന് സ്വര്ണവിലയില് നേരിയ വര്ധനവ്. പവന് 80 രൂപയുടെ വര്ധനവാണ് രേഖപ്പെടുത്തിയിരിക്കുന്നത്. 58,360 രൂപയാണ് ഇതോടെ ഒരു പവന് സ്വര്ണത്തിന്റെ വിപണിയിലെ നിരക്ക്. 10 രൂപയുടെ വര്ധനവാണ് ഗ്രാമിന് ഉണ്ടായിരിക്കുന്നത്. ഒരു ഗ്രാം സ്വര്ണത്തിന്റെ വില 7295 രൂപയാണ്. കഴിഞ്ഞ ദിവസം സ്വര്ണവിലയില് ഇടിവ് രേഖപ്പെടുത്തിയിരുന്നു. ആഭരണപ്രേമികള്ക്ക് ആശങ്ക പടര്ത്തുന്നതാണ് നിലവിലെ വിപണിയിലെ നിരക്ക്.
സ്വര്ണം ഇനിയും മുന്നോട്ടു പോകുമെന്നാണ് അന്താരാഷ്ട്ര മാര്ക്കറ്റില് നിന്നുള്ള സൂചനകള്. പശ്ചിമേഷ്യന് സംഘര്ഷം അയവില്ലാതെ തുടരുന്നതും അമേരിക്കന് ഫെഡറല് റിസര്വ് അടുത്ത മാസം നിരക്ക് കുറയ്ക്കാനുള്ള സാധ്യതകളും സ്വര്ണ ഡിമാന്ഡ് വര്ധിപ്പിക്കുന്നു. ഇറാനെതിരേ ഇസ്രയേലിന്റെ തിരിച്ചടി വൈകിയേക്കില്ലെന്ന വാര്ത്തകളും പുറത്തു വരുന്നുണ്ട്. സ്വര്ണത്തില് ഇതെല്ലാം പ്രതിഫലിക്കും. ഔണ്സിന് 2,725 ഡോളറിലാണ് നിലവില് അന്താരാഷ്ട്ര വിപണിയില് സ്വര്ണം. ഈ വര്ഷം തന്നെ 3,000 ഡോളര് മറികടന്നേക്കുമെന്ന് പ്രവചിക്കുന്നവരുടെ എണ്ണവും കൂടുതലാണ്.
ലോകത്തെ ഏറ്റവും വലിയ സ്വര്ണ ഉപഭോക്താക്കളാണ് ഇന്ത്യ. ടണ് കണക്കിന് സ്വര്ണം ഓരോ വര്ഷവും രാജ്യത്ത് ഇറക്കുമതി ചെയ്യപ്പെടുന്നു. അതുകൊണ്ട് ആഗോള വിപണിയില് സംഭവിക്കുന്ന ചെറിയ ചലനങ്ങള് പോലും അടിസ്ഥാനപരമായി ഇന്ത്യയിലെ സ്വര്ണവിലയില് പ്രതിഫലിക്കും. രാജ്യാന്തര വിപണിയില് സ്വര്ണത്തിന് വില കുറഞ്ഞാല് ഇന്ത്യയില് വില കുറയണമെന്ന് നിര്ബന്ധമില്ല. രൂപയുടെ മൂല്യം, പ്രാദേശികമായ ആവശ്യകത, ഇറക്കുമതി തീരുവ എന്നീ ഘടകങ്ങള് ഇന്ത്യയിലെ സ്വര്ണവില നിശ്ചയിക്കുന്നതില് പ്രധാന പങ്കുവഹിക്കും.
