കെ.എസ്.ആർ.ടി.സി ബസുകളിൽ സ്ത്രീകൾക്ക് സൗജന്യയാത്ര നൽകാനുള്ള യു.ഡി.എഫ് സർക്കാരിന്റെ തീരുമാനത്തിനെതിരെ പ്രതിഷേധവുമായി സ്വകാര്യ ബസ് ഉടമകൾ. ഈ പ്രഖ്യാപനം കേരളത്തിലെ സ്വകാര്യ ബസ് വ്യവസായത്തെ പൂർണ്ണമായും തകർക്കുമെന്ന് ആൾ കേരള ബസ് ഓപറേറ്റേഴ്സ് ഓർഗനൈസേഷൻ ആരോപിച്ചു. തീരുമാനം പുനഃപരിശോധിക്കണമെന്നും ഉടമകളുമായി ചർച്ചയ്ക്ക് സർക്കാർ തയ്യാറാകണമെന്നും സംഘടന ആവശ്യപ്പെട്ടു.
ഏകപക്ഷീയമായ തീരുമാനമെന്ന് ആരോപണം: സ്ത്രീകൾക്ക് സൗജന്യയാത്ര അനുവദിക്കുന്നത് സംബന്ധിച്ച സർക്കാർ തീരുമാനം ഏകപക്ഷീയമാണെന്ന് ആൾ കേരള ബസ് ഓപറേറ്റേഴ്സ് ഓർഗനൈസേഷൻ സംസ്ഥാന ജനറൽ സെക്രട്ടറി ടി. ഗോപിനാഥൻ പറഞ്ഞു. സ്വകാര്യ ബസ് ഉടമകളോട് ആലോചിക്കാതെ എടുത്ത ഈ തീരുമാനം പൊതുഗതാഗത സംവിധാനത്തെ താറുമാറാക്കുമെന്നും അദ്ദേഹം പാലക്കാട് പറഞ്ഞു.
സ്വകാര്യ ബസ് മേഖലയിലെ പ്രതിസന്ധി: നിലവിൽ പ്രതിദിനം 19 ലക്ഷം സ്ത്രീകളാണ് കെ.എസ്.ആർ.ടി.സി സർവീസുകളെ ആശ്രയിക്കുന്നത്. ഈ വിഭാഗത്തിന് സൗജന്യയാത്ര നൽകുന്നതോടെ സ്ത്രീകൾ പൂർണ്ണമായും കെ.എസ്.ആർ.ടി.സിയിലേക്ക് മാറും. ഇതോടെ സ്വകാര്യ ബസ്സുകൾക്ക് വിദ്യാർത്ഥികളെ മാത്രം കയറ്റി സർവീസ് നടത്തേണ്ടി വരുന്ന ഗതികേടുണ്ടാകുമെന്ന് ഉടമകൾ ചൂണ്ടിക്കാട്ടുന്നു.
കേരളത്തിലെ സാഹചര്യം വ്യത്യസ്തം: തമിഴ്നാട്ടിലും കർണാടകയിലും നടപ്പിലാക്കിയ മാതൃക കേരളത്തിൽ പ്രായോഗികമല്ലെന്ന് ടി. ഗോപിനാഥൻ വ്യക്തമാക്കി. അവിടെ സ്വകാര്യ ബസ്സുകളുടെ എണ്ണം കുറവാണെന്നും എന്നാൽ കേരളത്തിൽ ഭൂരിഭാഗം പേരും സ്വകാര്യ ബസ്സുകളെയാണ് ആശ്രയിക്കുന്നതെന്നും അദ്ദേഹം പറഞ്ഞു. വി.ഡി. സതീശന്റെ ‘പുതുയുഗ യാത്ര’യ്ക്കിടെ മേഖലയിലെ പ്രശ്നങ്ങൾ ധരിപ്പിച്ചിരുന്നതായും പ്രശ്നപരിഹാരം ഉണ്ടാകുമെന്ന ഉറപ്പ് പാലിക്കപ്പെട്ടില്ലെന്നും ഉടമകൾ ആരോപിച്ചു.
സ്വകാര്യ ബസ് മേഖലയെ സംരക്ഷിക്കുന്നതിനായി പ്രത്യേക പാക്കേജ് പ്രഖ്യാപിക്കണമെന്നാണ് സംഘടനയുടെ ആവശ്യം. ആവശ്യങ്ങൾ അംഗീകരിച്ചില്ലെങ്കിൽ ശക്തമായ സമരപരിപാടികളിലേക്ക് നീങ്ങാനാണ് ബസ് ഉടമകളുടെ തീരുമാനം.
