തേഞ്ഞിപ്പലം: കാലിക്കറ്റ് സര്‍വകലാശാലയില്‍ അടുത്ത അധ്യയനവര്‍ഷം മുതല്‍ വിവിധ കോഴ്‌സുകളുടെ പ്രവേശനത്തിനുള്ള ഓണ്‍ലൈന്‍ രജിസ്‌ട്രേഷന്‍ ഫീസ് കുത്തനെ കൂട്ടാന്‍ സിന്‍ഡിക്കേറ്റ് തീരുമാനം. സര്‍ക്കാര്‍ നിര്‍ദേശത്തിന്റെ പശ്ചാത്തലത്തില്‍ കൂടുതല്‍ ധനസമാഹരണം ലക്ഷ്യംവെച്ച് ഓണ്‍ലൈന്‍ രജിസ്‌ട്രേഷന്‍ ഫീസ് കുത്തനെ കൂട്ടിയത്. കുറച്ചുകാലമായി കാലിക്കറ്റില്‍ വര്‍ധനവില്ലായിരുന്നവെന്നാണ് സിന്‍ഡിക്കേറ്റിന്റെ നിലപാട്. പെന്‍ഷന്‍ ഫണ്ട് ബാധ്യതയടക്കം സര്‍വകലാശാലകള്‍ സ്വയം കണ്ടെത്തണമെന്ന സര്‍ക്കാര്‍ നിര്‍ദേശത്തിന്റെ പശ്ചാത്തലത്തില്‍ കൂടുതല്‍ ധനസമാഹരണമാണ് ലക്ഷ്യം. പ്രവേശനപരീക്ഷയില്ലാത്ത ബിരുദ കോഴ്‌സുകള്‍ക്കും ബിരുദാനന്തര കോഴസുകള്‍ക്കും 280 രൂപയായിരുന്നു ജനറല്‍ വിഭാഗത്തില്‍ അപേക്ഷാഫീസ്. ഇത് 420 ആയി വര്‍ധിപ്പിക്കാനാണ് തീരുമാനം. പട്ടികജാതി-വര്‍ഗ വിഭാഗത്തിന് 115 രൂപയായിരുന്നത് 175 ആക്കി. എംബിഎക്ക് 555 രൂപയായിരുന്നു ജനറല്‍ വിഭാഗത്തിനുള്ള ഫീസ്. ഇനി 830 രൂപ കൊടുക്കണം.പട്ടികജാതി-വര്‍ഗ വിഭാഗത്തിന്റേത് 187ല്‍നിന്ന് 280 ആയി ഉയര്‍ത്തി. ബി.എഡിന് യാഥാക്രമം 555ഉം 170ഉം ആയിരുന്ന അപേക്ഷഫീസ് 650ഉം 200ഉം രൂപയാക്കി.
