സിനിമ നടിമാരെ സമൂഹമാധ്യമങ്ങളിലൂടെ അപമാനിച്ചെന്ന പരാതിയില് സന്തോഷ് വര്ക്കി (ആറാട്ടണ്ണന്) അറസ്റ്റില്. എറണാകുളം നോര്ത്ത് പൊലീസാണ് സന്തോഷ് വര്ക്കിയെ കസ്റ്റഡിയിലെടുത്തത്. സിനിമ നടിമാര്ക്കെതിരെ ഫേസ് ബുക്ക് പേജിലൂടെ അശ്ലീല പരാമര്ശം നടത്തിയ സംഭവത്തിലാണ് പൊലീസ് കസ്റ്റഡിയിലെടുത്തത്. നടി ഉഷാ ഹസീനയുടെ പരാതിയിലാണ് നടപടി.
ആലപ്പുഴ ഡിവൈഎസ്പിക്ക് ആണ് നടി പരാതി നല്കിയത്. 40 വര്ഷത്തോളമായി സിനിമാ മേഖലയില് പ്രവര്ത്തിക്കുന്ന തന്നെ ആറാട്ടണ്ണന്റെ പരാമര്ശം വ്യക്തിപരമായി വേദനിപ്പിച്ചു എന്നും പരാതിയില് പറയുന്നു. നടിമാര്ക്ക് എതിരായ പരാമര്ശം സ്ത്രീത്വത്തെ അപമാനിക്കുന്നതാണെന്നും ഉഷ ഹസീനയുടെ പരാതിയില് ചൂണ്ടിക്കാട്ടുന്നു. നിരന്തരം സ്ത്രീകള്ക്ക് എതിരെ അശ്ലീല പരാമര്ശം നടത്തുന്ന സന്തോഷ് വര്ക്കിക്ക് എതിരെ അധികൃതര് കര്ശന നടപടി സ്വീകരിക്കണമെന്നും നടി പരാതിയില് ആവശ്യപ്പെട്ടു.
അമ്മ സംഘടനയിലെ അംഗങ്ങള് ഉള്പ്പെടെ നിര്വധി നടിമാര് സന്തോഷ് വര്ക്കിക്കെതിരെ പൊലീസില് പരാതി നല്കിയിരുന്നു. തുടര്ന്നാണ് കേസെടുത്ത പൊലീസ് സന്തോഷ് വര്ക്കിയെ പിടികൂടിയത്. വിഷുവിന് റിലീസ് ചെയ്ത മമ്മൂട്ടി നായകനായ ബസൂക്കയില് സന്തോഷ് വര്ക്കി അഭിനയിച്ചിരുന്നു. നേരത്തെ സിനിമ കാണാതെ റിവ്യു പറഞ്ഞതിന്റെ പേരില് സന്തോഷ് വര്ക്കിയെ ആളുകള് മര്ദ്ദിച്ചിരുന്നു.
