കൊല്ലം ഓയൂരില് ആറ് വയസ്സുകാരിയെ തട്ടിക്കൊണ്ടുപോയ കേസില് പിടിയിലായിരിക്കുന്നത് ചാത്തന്നൂര് സ്വദേശി പത്മകുമാറും കുടുംബവും എന്ന് പൊലീസ്. കൊല്ലം ചാത്തന്നൂര് കവിതാലയത്തില് പത്മകുമാര് (52) ഭാര്യ അനിത, മകള് അനുപമ എന്നിവരാണ് ഇപ്പോള് പൊലീസിന്റെ കസ്റ്റഡിയിലുള്ളത്. ഇവരെ തമിഴ്നാട് തെങ്കാശി പുളിയറയില് നിന്നാണ് പൊലീസ് ഇന്ന് കസ്റ്റഡിയിലെടുത്തത്. ഇവരെ അടൂര് കെഎപി ക്യാംപിലെത്തിച്ചു.
ഉന്നത ഉദ്യോഗസ്ഥരെത്തി ഇവരെ ചോദ്യം ചെയ്യുകയാണ്. കുട്ടിയെ തട്ടിക്കൊണ്ടുപോകാന് ഉപയോഗിച്ച വെള്ള കാറും കസ്റ്റഡിയിലടുത്തു. ചാത്തന്നൂര് കോതേരിയില് നിന്നുമാണ് കാര് കസ്റ്റഡിയിലെടുത്തത്. രണ്ട് കാറും ഓട്ടോറിക്ഷയും ഉള്പ്പെടെ 3 വാഹനങ്ങളാണ് ഇപ്പോള് പൊലീസ് കസ്റ്റഡിയിലുള്ളത്.
പത്മകുമാറിന്റേത് ഒറ്റപ്പെട്ട ജീവിതമെന്ന് പ്രദേശവാസികള്പറഞ്ഞു. ആരോടും സംസാരിക്കുകയോ സഹകരിക്കുകയോ ചെയ്യാറില്ല. കേബിള് ടിവി ബിസിനസ് ആയിരുന്നു ആദ്യം ഇയാളുടെ ജോലി. പിന്നീട് റിയല് എസ്റ്റേറ്റിലേക്ക് തിരിഞ്ഞു. കൂടാതെ ഇവര്ക്ക് സ്വന്തമായി ഒരു ബേക്കറി നടത്തുന്നുണ്ട്. ഈ ബേക്കറിയുടെ കാര്യങ്ങള് നോക്കി നടത്തുന്നത് പത്മകുമാറിന്റെ ഭാര്യ അനിതയാണ്. ഇവര്ക്ക് ജോലിയില്ല. ഇവര്ക്ക് ഫാം ഉള്ളതായും നാട്ടുകാര് പറഞ്ഞു. ഇയാള് രണ്ട് കാറുകളുണ്ട്.
