മഞ്ചേരി: ഫുട്ബാളിനെ നെഞ്ചിലേറ്റിയ മലപ്പുറത്തേക്ക് വിരുന്നെത്തിയ സന്തോഷ് ട്രോഫി ടൂര്‍ണമെന്റിന് ശനിയാഴ്ച വിസില്‍ മുഴങ്ങുമ്പോള്‍ ജില്ല മുഴുവന്‍ ആവേശത്തില്‍.കടലുണ്ടിപ്പുഴയുടെ തീരത്ത് തലയെടുപ്പോടെ നില്‍ക്കുന്ന പുല്‍മൈതാനത്തിലെ വെള്ളിവെളിച്ചത്തില്‍ ഇനിയുള്ള 17 രാവുകളില്‍ കാല്‍പന്തുകളിയുടെ ആരവമുയരും.
ജില്ല ആദ്യമായി ആതിഥേയത്വം വഹിക്കുന്ന ടൂര്‍ണമെന്റിന്റെ ഒരുക്കങ്ങളെല്ലാം പൂര്‍ത്തിയായി. ആദ്യമത്സരത്തില്‍ കരുത്തരായ ബംഗാള്‍ അട്ടിമറി വീരന്മാരായ പഞ്ചാബിനെ കോട്ടപ്പടി മൈതാനത്ത് നേരിടും. രാവിലെ 9.30നാണ് മത്സരം.
രാത്രി എട്ടിന് കേരളം രാജസ്ഥാനെ പയ്യനാട് സ്റ്റേഡിയത്തില്‍ നേരിടും. ഫുട്ബാളിനെ ഇടനെഞ്ചില്‍ കൊണ്ടുനടക്കുന്നവരുള്ള നാട്ടിലേക്ക് വരുന്ന മത്സരം മലപ്പുറത്തെ കളിപ്രേമികള്‍ ആവേശത്തോടെയാണ് എതിരേറ്റത്.
പയ്യനാട് സ്‌പോര്‍ട്‌സ് കോംപ്ലക്‌സ് സ്റ്റേഡിയവും കോട്ടപ്പടി സ്റ്റേഡിയവും മത്സരങ്ങള്‍ക്ക് വേദിയാകുമെന്ന് പ്രഖ്യാപിച്ചതോടെ ആവേശം ഇരട്ടിയായി.
