തൃശൂർ കോടാലിയിൽ ഉറങ്ങിക്കിടന്ന സഹോദരങ്ങളെ പാമ്പ് കടിച്ച സംഭവത്തിൽ എട്ടു വയസ്സുകാരൻ ആൽജോയ്ക്ക് ഇന്ന് കണ്ണീരോടെ വിട. പാമ്പുകടിയേറ്റ് ചികിത്സയിലുള്ള മൂത്ത സഹോദരൻ അനോജ് ഇപ്പോഴും തീവ്രപരിചരണ വിഭാഗത്തിൽ ചികിത്സയിലാണ്. ഭക്ഷണത്തിൽ നിന്നുള്ള അസ്വാഭാവികതയെന്ന് കരുതിയിടത്തുനിന്നും ഒരു ജീവൻ പൊലിഞ്ഞതിന്റെ നടുക്കത്തിലാണ് നാട്.
കഴിഞ്ഞ ദിവസം രാത്രി രണ്ടു മണിയോടെയാണ് ആൽജോയ്ക്കും അനോജിനും ദേഹാസ്വാസ്ഥ്യം അനുഭവപ്പെട്ടത്. തലേദിവസം അവാക്കാഡോ ജ്യൂസ് കുടിച്ച് കിടന്നതിനാൽ ഭക്ഷ്യവിഷബാധയാണെന്നാണ് വീട്ടുകാർ ആദ്യം സംശയിച്ചത്. തുടർന്ന് ചാലക്കുടിയിലെ സ്വകാര്യ ആശുപത്രിയിൽ എത്തിച്ചപ്പോഴാണ് പാമ്പ് കടിയേറ്റതാണെന്ന് സ്ഥിരീകരിച്ചത്. അപ്പോഴേക്കും എട്ടു വയസ്സുകാരൻ ആൽജോ മരണത്തിന് കീഴടങ്ങിയിരുന്നു.
ആശുപത്രിയിൽ വച്ച് കുട്ടികളുടെ ശരീരത്തിൽ പാമ്പ് കടിയേറ്റ പാടുകൾ ഡോക്ടർമാർ കണ്ടെത്തുകയായിരുന്നു. പിന്നാലെ നാട്ടുകാരും ബന്ധുക്കളും വീട്ടിൽ നടത്തിയ പരിശോധനയിലാണ് കുട്ടികൾ കിടന്നിരുന്ന തലയണയ്ക്കടിയിൽ നിന്ന് പാമ്പിനെ കണ്ടെത്തിയത്. അതിമാരക വിഷമുള്ള ശങ്കുവരയൻ (വെള്ളിക്കെട്ടൻ) വിഭാഗത്തിൽപ്പെട്ട പാമ്പാണ് കുട്ടികളെ കടിച്ചത്.
- ആൽജോയുടെ സംസ്കാരം: ഇന്ന് ഉച്ചയ്ക്ക് മൂന്ന് മണിക്ക് നടക്കും.
- അനോജിന്റെ നില: വെന്റിലേറ്ററിൽ കഴിയുന്ന അനോജിന്റെ ആരോഗ്യനില ഗുരുതരമായി തുടരുകയാണ്. ഇന്നലെ ആറ് മണിക്കൂർ നീണ്ട ശസ്ത്രക്രിയയ്ക്ക് കുട്ടിയെ വിധേയനാക്കിയിരുന്നു.
തലയണയ്ക്കടിയിൽ ഒളിച്ചിരുന്ന മരണം പിഞ്ചുബാലന്റെ ജീവൻ കവർന്നത് കോടാലി ഗ്രാമത്തിന് ഇനിയും വിശ്വസിക്കാനായിട്ടില്ല. പ്രിയപ്പെട്ടവന്റെ വിയോഗത്തിനൊപ്പം മൂത്ത സഹോദരന്റെ ജീവനായുള്ള പ്രാർത്ഥനയിലുമാണ് പ്രദേശം.
