പാലക്കാട് സീറ്റുകള് വെച്ചുമാറാന് യുഡിഎഫില് ധാരണ. പട്ടാമ്പി, കോങ്ങാട് സീറ്റുകള് വെച്ചുമാറാന് കോണ്ഗ്രസും മുസ്ലിം ലീഗും ധാരണയായി. പട്ടാമ്പിയില് മുസ്ലിം ലീഗും കോങ്ങാട് കോണ്ഗ്രസും മത്സരരംഗത്തു ഇറങ്ങും. പട്ടാമ്പിയില് എം. എ സമദിന്റെ പേര് മുന്ഗണനയിലുണ്ട്. തദ്ദേശ തെരഞ്ഞെടുപ്പിലെ നേട്ടത്തിന് പിന്നാലെ മുസ്ലിം ലീഗ് തന്നെ പട്ടാമ്പി സീറ്റ് ആവശ്യപ്പെടുകയായിരുന്നു.
വി ഫോര് പട്ടാമ്പിയെ കൂടെ നിര്ത്തിയതടക്കം യുഡിഫ് മുന്നേറ്റത്തില് ഇത്തവണ ലീഗ് നിര്ണായക പങ്ക് വഹിച്ചു. യുഡിഫ് വോട്ട് വര്ധിക്കാനും ഇത് കാരണമായി. ഇതോടെ നിയമ സഭ തെരഞ്ഞെടുപ്പില് വിജയസാധ്യത കണക്കിലെടുത്താണ് പട്ടാമ്പിയില് മുസ്ലിം ലീഗ് മത്സര രംഗത്തിറങ്ങുന്നത്. പകരം നിലവില് ലീഗ് മത്സര രംഗത്ത് ഉള്ള കോങ്ങാട് സീറ്റ് കോണ്ഗ്രസിന് നല്കും. പട്ടാമ്പിയില് മുസ്ലിം ലീഗില് നിന്നും എം എ സമദിന്റെ പേരാണ് മുന്ഗണനയിലുള്ളത്. കഴിഞ്ഞ നിയമസഭ തെരഞ്ഞെടുപ്പില് സമദിന്റെ പേര് പരിഗണനയില് ഉണ്ടായിരുന്നെങ്കിലും പിന്നീട് തഴയപെടുകയായിരുന്നു. ലീഗ് ജില്ലാ പ്രസിഡന്റ് മരക്കാര് മാരായമംഗലം, അബ്ദുല് റഷീദ് എന്നിവരുടെ പേരും പരിഗണനയിലുണ്ട്.
